පාසලෙන් ඉවත්වී වසර දෙකකි. අධ්‍යාපන සහතික පිටපතක් ලබා ගැනීමට ගියේය. පැය හයක් තිස්සේ රස්තියාදු කිරීමෙන් පසුව දිසාපාමොක්් කීවේ, පාසල් නිල ඇඳුමින් සැරසී එන ලෙස ලූ.
නිදහස් අධ්‍යාපනය නිසාම ගමට පිරිනැමුන පාසලකි. දෙවසරකට පෙර උසස් පෙළ විභාගයට පෙනී සිටි තරුණයකු පසුගියදා එම විදුහලට ගියේ රැකියාවක් පිළිබඳ සම්මුඛ පරීක්ෂණයට ඉදිරිපත් කිරීමට පාසලෙන් උසස් පෙළ විභාගයේ ප‍්‍රතිඵල සටහනක් ලබා ගැනීම සඳහාය. ඔහු මේ ගමන ගියේ සුදු අත්දිග කමිසයකින් හා දිගු කලිසමකින් සැරසීගෙනය.
උදේ හතට පාසලට ගිය මේ තරුණයාට අවස්ථාව ලැබුණේ දහවල් එකට පමණය. එතෙක් වේලා ඔහු කාර්යාලය අසල සිටගෙන සිටියේය. කාරණය ඇසූ දිසාපාමොක්වරයා  ”සහතිකය අවශ්‍ය නම් පාසල් නිල ඇඳුමෙන් එන්න” යනුවෙන් කියා ආසනයෙන් නැගිට්ටේය. තරුණයා තමන් පාසල් සිසුවකු නොවන බවට කරුණු දක්වද්දී කිසිවක් නෑසුණු දිසාපාමොක් යන්නට ගියේය. මෙය බලා සිටි විදුහලේ කාර්ය මණ්ඩලය මූණට මූණ බලා ගත්තේ මේ අවනඩුව කාට කියන්නදැයි නොතේරුණ නිසාය.
මේ වනවිට මේ ප‍්‍රදේශයේ කලාප කාර්යාලයට ද මේ සිද්ධිය දැන ගන්නට ලැබී ඇත. මේ ආකාරයෙන්ම සාරියකින් සැරසී පාසලට ගිය ගුරු පුහුණුව ලබන ආදි ශිෂ්‍යාවකට ද නිල ඇඳුමින් එන ලෙස දන්වා හරවා යැවූ පුවතක් ද වාර්තාවී ඇති අතර කිසිවිටෙක කිසිවෙකු රස්තියාදු නොකරන ලෙසට විදුහල්පතිවරයාට දැඩි අවවාදයක් කර ඇතැයි ද වාර්තා වේ.