( ඩී.කේ.රත්න )

බුත්තල නගර මධ්‍යයේ ප්‍රධාන බස්රථ නැවතුම්පළ ඉදිරිපිට පිහිටි තොරණට නැගි හිටපු යුද හමුදා සෙබළෙකු අද (19) උපවාසයක් ආරම්භ කර ඇතයි බුත්තල පොලීසිය පවසයි.

බුත්තල ගෝනගංආර ගල්බොටාව පුස්වල යන ලිපිනයේ පදිංචි, හය වන ගැමුණු හේවා බලකායට අනුයුක්තව සේවයේ යෙදී සිටි ඩී.එම්.සංජීව උදය කුමාර නැමති 39 හැවිරිදි හැවිරිදි පුද්ගලයෙකු මෙම උපවාසය ආරම්භ කර ඇත.
 
මෙම පුද්ගලයා යුද හමුදාවේ සේවයේ යෙදී සිටියදී 2002 වර්ෂයේදී බුත්තල ගෝණගංආර ප්‍රදේශයේ සිදුවූ කොල්ලකෑමේ සිද්ධියකට අත්අඩංගුවට ගෙන නඩු පැවරීමෙන් පසු 2012 වර්ෂයේදී අධිකරණයෙන් වරදකරු වී 2012 වර්ෂයේ සිට 2017 දක්වා වසර පහක සිර දඬුවමක් විදීමෙන් පසු නිදහස් වී පැමිණ ඇතයි පොලීසිය කියයි.
 
එම සිද්ධිය මත මෙම පුද්ගලයා යුද හමුදාවෙන් ඉවත් කර තිබෙන අතර නමුත් තමන් හට යුද හමුදාවෙන් ලැබීමට නියමිත වන්දි මුදල් ලබා දෙන ලෙස ඉල්ලා මෙම උපවාසය ආරම්භ කර ඇත.

බුත්තල පොලීසියේ නිලධාරීහු මේ පිළිබඳව පරීක්ෂණ පවත්වති.

(ඡායාරූප - නයනජීව බණ්ඩාර)