(දඹුල්ල කාංචන කුමාර ආරියදාස)
රට තුළ විශාල වශයෙන් ක්‍රියාත්මක වන ව්‍යවසනකාරී සේනා දළඹු විනාශය පිළිබඳව රජය ගනු ලබන ක්‍රියාමාර්ග පිළිබඳව සෑහීමකට පත් විය නොහැකි බවත් වහාම දේශීය නව සොයාගැනීම් හරහා සේනා දළඹු මර්ධනය කිරීමට සූදානම් වෙන්න යැයි  සමස්ත ලංකා ගොවිජන සම්මේලනය රජයෙන් ඉල්ලීමක් කර සිටියි.

රජය ගන්නා ක්‍රියාමාර්ග සඳහා සමස්ත ලංකා ගොවිජන සම්මේලනයේ සහයෝගය ලබා දීමට එකඟත්වය පළකර බවද සඳහන් කළේය.

සමස්ත ලංකා ගොවිජන සම්මේලනය අද (09) මාධ්‍ය හමුවක් දඹුල්ලේදී කැඳවා තිබිණි. එම අවස්ථාවට සේනා දළඹු මර්දනය සඳහා දේශීය ප්‍රතිකර්ම සොයාගත් දේශීය නව නිර්මාණකරුවන් කිහිපදෙනෙකුද කැඳවා තිබිණි.

මාධ්‍ය හමුවේ දී ඔවුන් විසින් රැගෙන ආ සේනා දළඹු  මර්දනය කිරීම සඳහා සූදානම් කර තිබූ නිෂ්පාදනය කළ දියරයක්ද ප්‍රදර්ශනය කරමින් එය ඉසීමෙන් විනාඩි කිහිපයක් තුළ සේනා දළඹුවා මිය යන ආකාරයද පෙන්වා දීම විශේෂත්වයකි.
 මිනිස් සිරුරට හෝ මහ පොළොවට කිසිදු වසක් විසක් නොමැතිව  සේනා දළඹුවා විනාඩි කිහිපයක් තුළ සම්පූර්ණයෙන්ම විනාශ කිරීමේ මෙම ක්‍රියාවලිය පිළිබඳව රජයට දැනුම් දුන්නද කොතෙක් ඒ සඳහා අවධානය යොමු නොවීම නිසා මේ තත්ත්වය මාධ්‍ය හමුවේ දී ඔවුහු අවධාරණය කළහ.

මෙහිදී අදහස් දැක්වූ සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා කියා සිටියේ මාකඳුරේ මධූෂ් නැමති පාතාල සාමාජිකයාගේ සිද්ධියත් සමග සේනා  දළඹු  විනාශය  ජනතාවගෙන් හොර රහසේ ඉවත් කිරීමේ අමතක කිරීමේ උත්සාහයක නිරතව සිටින බවය. දේශීය  සොයාගැනීම් උපයෝගී කරගෙන දළඹුවන් මර්දනය කිරීමේ වැඩපිළිවෙළ ක්‍රියාත්මක නොකළහොත් ඉදිරියේදී බෝග රැසකට දැඩි අවධානම් තත්වයක් පවතින බවද පෙන්වා දුන්නේය.

මේ අවස්ථාවේදී දේශීය පර්යේෂකයෙකු වූ ආචාර්ය අශෝක රන්වල මහතා, රසික සමන්ප්‍රිය  ජේ .ඒ .ඩබ්ලිව් .එල් .ප්‍රියදර්ශන, සසික සමන්ප්‍රිය යන නවක සොයාගැනීම් සිදුකල පිරිසද අදහස් දක්වමින් කියා සිටියේ දේශීය සොයාගැනීම් වලින් සේනා දළඹු උවදුර සම්පූර්ණයෙන්ම රටෙන් ඉවත් කළ හැකි බවය.