(හිරාන් ප්‍රියංකර ජයසිංහ)

පල්ලම සෙන්ගල් ඔය අමුණ පැති බැම්ම කඩා ගෙන යාමෙන් ආරච්චිකට්ටුව ඇතුළු ප්‍රදේශ ගණනාවක් දැඩි අවදානමකට ලක්ව ඇති බව පුත්තලම ආපදා කළමනාකරණ ඒකකයේ සහකාර අධ්‍යක්ෂ රංජීත් අලහකොන් මහතා අද (22) පැවසීය.

මෙම සෙන්ගල් ඔය අමුණේ පස් වලින් සකසා තිබූ එක් පැති බැම්මක් අධික ජල කඳට කැඩි යාම ආරම්භ වී තිබු අතර අද (22) වන විට එය බරපතල ලෙස කැඩී යාමට ලක්ව ඇත.

ආරච්චිකට්ටුව ප්‍රදේශීය ලේකම් බල ප්‍රදේශයේ ආනවිලුන්දාව රැම්සා අභය භූමිය ඇතුළු වැව් පද්ධතියට දැදුරු ඔයෙන් ගලා යන ජලය සෙන්ගල් ඔය අමුණ හරහා රැගෙන ඒමේ අරමුණින් මෙම අමුණ ඉදිකිරිම 2018 වසරේ මැයි මාසයේ 18 දින ආරම්භ කෙරිණි.

මෙයට පෙර මෙම අමුණ සකස් කර තිබුණ ද එය නිසි ලෙස සකස් කර නොතිබිමෙන් දැදුරු ඔයේ දැවැන්ත ජල කඳට කඩා ගෙන ගොස් තිබිණි.

කෙසේ නමුත් ජනතාව චෝදනා එල්ල කරන්නේ දැදුරු ඔයේ දැවැන්ත ජල කදට සෙන්ගල් අමුණේ පස් පැති බැම්ම නොගැලපෙන බව දැන දැනම නිළධාරින් එය එලෙසම සකස් කිරීමෙන් මෙලෙස කඩාගෙන ගොස් ඇති බවයි.

අමුණ කැඩි යාමත් සමඟ එයින් ගලා එන අධික ජල කඳ හේතුවෙන් පහළ පිහිටි ගම්මාන රැසක් ජලයෙන් යටවිමේ අවදානමක් පවතින බවත් මේ නිසාම කුඹුරු විශාල ප්‍රමාණයක් ජලයෙන් යටවී තිබේ.