(කාංචන කුමාර ආරියදාස)
 
පෙබරවාරි පළමු වැනිදා සිට සීගිරියට ඇතුළු වීමේදී කිසිදු පොලිතීන් ප්ලාස්ටික් ද්‍රව්‍ය රැගෙන යෑම තහනම් කලාපයක් බවට පත් කිරීමට මධ්‍යම සංස්කෘතික අරමුදල තීරණය කර තිබේ.

ඒ අනුව මධ්‍යම සංස්කෘතික අරමුදල ආරක්ෂක අංශය සහ බොහෝ සේවකයින් එක්ව සීගිරි නැරඹීම සඳහා පැමිණෙන දෙස් විදෙස් සංචාරකයන්ගේ ගමන් මලු පරික්ෂා කර එහි  රැගෙන යන පොලිතීන් සහ ප්ලාස්ටික් ද්‍රව්‍ය ඉවත් කිරීමේ වැඩසටහනක් ක්‍රියාත්මක කර තිබේ.

ස්ථාන ගණනාවකින් සංචාරකයන් දැනුවත් කරමින්  මෙම වැඩසටහන ක්‍රියාත්මක කරන බවත් සංචාරකයන් රැගෙන යන ජල බෝතල්වල ඇති පොලිතීන් ඉවත්කර ජල බෝතලය රැගෙන ගොස් ස්ථාන කිහිපයක තබා ඇති බෝතල් ඉවතලන කුටි වලට හිස් වූ වතුර බෝතල් දැමීම සඳහා පහසුකම් සපයා ඇතැයි මධ්‍යම සංස්කෘතික අරමුදල සීගිරි ව්‍යාපෘති කළමනාකරු මේජර් අනුර නිශාන්ත මහතා පැවසීය.

මේ දිනවල සීගිරිය නැරඹීම සඳහා දෙස් විදෙස් සංචාරකයන් මෙන්ම පාසල් ළමුන් ද විශාල වශයෙන් පැමිණෙමින් සිටිති. විදේශීය සංචාරකයන් බොහෝ දෙනෙකු කියා සිටියේ ලෝක උරුමයක් වූ සීගිරිය පොලිතීන් සහ ප්ලාස්ටික් වලින් තොර කලාපයක් කිරීම සඳහා ශ්‍රී ලංකා රජය ගත් ක්‍රියාමාර්ගය ඉතා අගය කළ යුතු බවයි.

එමෙන්ම පාසල් ළමුන් ගුරුවරුන් ආදී බොහෝ දෙනෙකු පැවසුවේ සීගිරිය වැනි ස්ථානයක් පොලිතීන් වලින් ප්ලාස්ටික් වලින් ඉවත්කර තැබීම හෙට දවසේ දරුවන් වෙනුවෙන් සිදුකරන සුවිශාල වූ කටයුත්තක් බවයි.

සීගිරිය ව්‍යාපෘති කළමනාකරු මේජර් අනුර නිශාන්ත මහතා කියා සිටියේ මධ්‍යම සංස්කෘතික අරමුදල සහ සියළු සේවකයන් මෙය  ඕනෑ කමින් සිදු කරන කටයුත්තක් බවය.