(නිමල් ජයරත්න)
 
පොළොන්නරුව - දිඹුලාගල ප්‍රධාන මාර්ගයේ මනම්පිටිය දලුකාන ප්‍රදේශයේ පලතුරු වෙළඳසැලකට අද(29) අලුයම කඩාවැදුණු වන අලියකු එහි තිබූ පලතුරු කා වෙළඳසැලට හානිකර පලාගොස් ඇත.

හානි වූ පලතුරුවල වටිනාකම රුපියල් 30,000ක බව එහි හිමිකාරිය පැවසුවාය.

මේවනවිට අවස්ථා 10කදී පමණ වනඅලි පැමිණ තම වෙළඳසැලට හානි කර ඇති බවත් මේ පිළිබදව මනම්පිටිය වනජීවී කාර්යාලයට තමා පැමිණිලි කර ඇති බවත් එහි හිමිකාරිනිය වන ජේ.එම්. මානෙල් කුමාරි මහත්මිය පැවසුවාය.

මෙම වනඅලියා මනම්පිටය කුඩාවැව ප්‍රදේශයේ සැරිසරමින් නිවාස බිඳ බත් සහ පලතුරු කෑමට හුරුව සිටින බවද ඇය කීවාය.
 
යම් මිනිස් ඝාතනයක් සිදුවීමට පෙර මෙම වනඅලියා ප්‍රදේශයෙන් පලවා හැරීමට කටයුතු කරන ලෙසද ඇය ඉල්ලා සිටියාය
 
මනම්පිටිය වනජීවී කාර්යාලයේ නිලධාරියෙකු පැවසුවේ මෙම අලියා දලුකාන යුද හමුදා කඳවුරෙන් බැහැර කරන බත් සහ පලතුරු කෑමට හුරුවී සිටින බවය.
 
වෙළඳසැලට හානි වීම සම්බන්ධයෙන් මානෙල් මහත්මිය තම කාර්යාලයට පැමිණිලි කර ඇතැයිද එම වන අලියා ප්‍රදේශයෙන් ඉවත්කිරීමට කටයුතු කරන බවද මනම්පිටිය වන සත්ව අඩවි ආරක්ෂක පී.ඩී. සුනිල් ශාන්ත මහතා පැවසීය.