(අනීෂා මානගේ)
 
වැසි සහිත කාලගුණය හේතුවෙන් අද(31) වන විට හම්බන්තොට දිස්ත්‍රික්කයේ පවුල් 573ක පුද්ගලයන් 1976 දෙනකු පීඩාවට පත්ව සිටින බව දිස්ත්‍රික් ආපදා කළමණාකරන මධ්‍යස්ථානය පවසයි.
 
හම්බන්තොට සාමෝදාගම විහාරස්ථානය, සීතාරාමය, වීරකැටිය කපුගම්පොත පුරාණ විහාරයේ සහ කිරින්ද සුළු ධීවර ප්‍රජා ශාලාවේ පිහිටුවා ඇති කඳවුරු හතරක අවතැන් වූ පුද්ගලයන් රඳවා සිටි අතර වීරකැටිය කපුගම්පොත විහාරස්ථානයේ සිටි පිරිස යළිත් නිවෙස් බලා පිටව ගොස් තිබිණි.
 
පුද්ගලයන් 250 දෙනකු අවතැන් කඳවුරුවල රැඳි සිටි බව ආපදා කළමණාකරන මධ්‍යස්ථානය කියයි.
 
හම්බන්තොට දිස්ත්‍රික්කයේ ජීවිත හානියක් හා තුවාල සිදුවීම් කිසිවක් වාර්තා වී නොමැත.
 
කිරම ඔය පිටාර ගැලීම හේතුවෙන් තංගල්ල - වීරකැටිය ප්‍රධාන මාර්ගය දින තුනක් තිස්සේ ජලයෙන් යටවී පවතින අතර මාර්ගය වසා තිබිණි. අද දින වන විට මාර්ගයේ ජලය තරමක් බැස ගොස් තිබීම හේතුවෙන් රථවාහන ගමනාගමනයට පහසුකම් සැලසී ඇත. නමුත් කුඩා වාහන ගමනාගමන කටයුතු අසීරුව පවතී.
 
බෙලිඅත්ත - වලස්මුල්ල මාර්ගය සහ කොළඹ - කතරගම ප්‍රධාන මාර්ගයේ ජලය අද සම්පූර්ණයෙන් බැස ගොස් තිබිණි. 
 
ඊයේ දින වන විට විවෘත කර තිබූ මුරුතවෙල සහ කැකිරිඕබඩ ජලාශවල වාන් දොරටු අද දින වන විට වසා තිබූ බව ආපදා කළමණාකරන මධ්‍යස්ථානය කියයි. දිස්ත්‍රික්කයේ ඇතැම් නිවාස තවමත් ජලයෙන් යටවී පවතී.