(ප්‍රසාද් මුතුකඩ)

සවුදි අරාබියේ දී මිය ගොස් වසර දෙක හමාරකට පසු එවන ලද නරක් වූ කාන්තා මළ සිරුර සම්බන්ධයෙන් පශ්චාත් මරණ පරීක්ෂණය පැවැත්වූ මීගමුව අධිකරණ වෛද්‍ය නිලධාරී රාහුල් හක් මහතා ඒ සම්බන්ධයෙන් විවෘත තීන්දුවක් ලබා දුන්නේය. 

මෙලෙස මිය ගොස් ඇත්තේ  ඇමස්ට් වත්ත, උඩුපුස්ලෑව  පදිංචිව සිටි සන්නාසි සුප්පයියා වල්ලි අම්මා ( 56) දෙදරු මවකි. ඇය වසර 23ක් සෞදියේ සේවය කර ඇත. 
 
1995 වසරේදි හාලි ඇල දික්වල ප්‍රදේශයේ   විදේශ රැකියා නියෝජිතයෙකුගේ  මාර්ගයෙන් සවුදි අරාබියට  ගොස් ඇති  මෙම කාන්තාව 2015 දෙසැම්බර් 12 වැනි දා     එරටදී  මිය ගොස් ඇති බවට  ලද තොරතුරකට අනුව  ඇගේ  පුතෙකු  වන නඩරාජා  එල්වන් (36)   විදේශ  සේවා නියුක්ති කාර්යංශයට පැමිණිලි කර තිබිණි. 
 
සවුදි අරාබියේ දමාම්හි ගෘහ සේවිකාවක ලෙස සේවයේ නියුතුව සිටියදී  මිය ගිය කාන්තාවගේ සිරුර වසර දෙකහමාරකට පසු ඊයේ ඊ.වයි  264 දරණ ගුවන් යානයෙන් කටුනායකට එවා ඇත.      
 
ගුවන්තොටුපොළ පොලිසියේ දැනුම් දීම අනුව අධිකරණ වෛද්‍යවරයා පශ්චාත් මරණ පරීක්ෂණය පැවැත්වූ  අතර සිරුර අධික ලෙස විනාශ වී ඇති හෙයින් මේ තම මවමදැයි සොයා බැලීමට ඩීඑන්ඒ පරීක්ෂණයක් සිදු කළ යුතු බව ඇගේ දරුවා ඇතුළු ඥාතීහු ඉල්ලා සිටියහ.