(විනීතා එම් ගමගේ)

සංචාරකයකන් සඳහා වනෝද්‍යානවල ප‍්‍රවේශ පත‍්‍රමිල අඩු කිරීමට කටයුතු කරන බව පරිසර හා වනජීවී සම්පත් ඉඩම් හා ඉඩම් සංවර්ධන අමාත්‍ය එස් එම් චන්ද්‍රසේන මහතා අද (22) පැවසීය.

සංචාරක ආකර්ෂණය වැඩිකර ගැනීමේ අරමුණින් මෙසේ ප‍්‍රවේශපත‍්‍ර මිල අඩුකිරීමට තිරණය කළ බව ද හෙතෙම ප‍්‍රකාශ කළේය.

වාර්ෂිකව මෙරටට එන සංචාරකයින්ගෙන් 25% ක් යාල වනෝද්‍යානය නැරඹීමට යන බව කී අමාත්‍යවරයා වනෝද්‍යාන කේන්ද්‍ර කරගෙන සංචාරක ව්‍යාපාරය තව බොහෝ දියුණු කළ හැකි වන බව ද පැවසීය.

ගෝඨාභය රාජපක්ෂ මහතා ගේ ප‍්‍රතිපත්ති ප‍්‍රකාශනයේ ද සඳහන් වන අන්දමින් මිලියන දහයක් සංචාරකයන් මෙරටට ආකර්ශණය කර ගැනීමේ ඉලක්කය අනුව මෙසේ ප‍්‍රවේශපත් මිල පහළ දැමීමට කටයුතු කරන්නේ යැයි කී චන්ද්‍රසේන මහතා ප‍්‍රවේශපත් මිල අඩුකරන අතරම වනෝද්‍යානවල සංචාරකයන් සඳහා වන පහසුකම් වැඩි කිරීමට කටයුතු කරන බව ද ප‍්‍රකාශ කළේය. 

මේ අතර මාදුරුඔය ජාතික වනෝද්‍යානයක් ලෙස ගැසට් කරනු ලැබුවත් මේ වනතුරුත් ඊට අදාළව එහි කිසිදු සංවර්ධන කටයුත්තක් සිදුව නැතැයි කී චන්ද්‍රසේන මහතා එහි සංවර්ධන කටයුතු ආරම්භ කරන බව ද කියා සිටියේය.

මේ අතර අලි ඇතුන් සංරක්ෂණය සඳහාම වෙන්වූ හොරොව්පොතාන අලි සංරක්ෂණ මධ්‍යස්ථානය සංචාරකයන් සඳහා ද විවෘත කිරීමට කටයුතු කරමින් සිටින බව ද ඔහු තවදුරටත් සඳහන් කළේය.