අනීෂා මානගේ  

තංගල්ල මූලික රෝහලේ විශේෂඥ වෛද්‍යවරයෙකුට මරණ තර්ජන කර කප්පම් ඉල්ලා සිටීමේ සිද්ධියකට සම්බන්ධ යැයි සැකපිට අත්අඩංගුවට ගෙන තංගල්ල මහේස්ත්‍රාත් අධිකරණයට ඉදිරිපත් කර මෙම මස 28 දක්වා රිමාන්ඩ් භාරයේ තැබීමට තංගල්ල ප්‍රධාන මහේස්ත්‍රාත්  ලිලාන් ටිලන්ත වරුසවිතාන මහතා අද (14) නියෝග කළේය.

මෙලෙස රිමාන්ඩ් භාරයට පත්වූයේ තංගල්ල මූලික රෝහලේ සාත්තු සේවකයෙක් ලෙස සේවයේ නිරතව සිටි එන්.ජී.මධුශංක (23) නම් ගාල්ල යක්කලමුල්ල ප්‍රදේශයේ පදිංචිකරුවෙකි. 

සැකකරු ඉකුත් 06 වැනිදා තංගල්ල මූලික රෝහලේ සේවයේ නියුතු  හා නාරි විශේෂඥ වෛද්‍යවරයාගේ ජංගම දුරකථනයට ඇමතුමක් ලබා දී පවසා ඇත්තේ රුපියල් ලක්ෂ පහලොවක කප්පම් මුදල් ලබා නොදුන්නහොත් වෛද්‍යවරයා හෝ වෛද්‍යවරයාගේ දරුවා ඝාතනය කරන බවයි.  

වෛද්‍යවරයා මේ සම්බන්ධයෙන් තංගල්ල මූලස්ථාන පොලිස් ස්ථානයට පැමිණිල්ලක් සිදුකර ඇති අතර දුරකථන ඇමතුම ලබාදුන් අංකය ඔස්සේ විමර්ශන සිදුකර සැකකරු ඊයේ(13) තංගල්ලේදී අත්අඩංගුවට ගෙන තිබිණි.