( සංජය මදුශාන් )
හබරණ ආසිරිගම ප්‍රදේශයේ වෙඩි වැදී මියගොස් සිටි වන අලියෙකුගේ මළ සිරැරක් අද (30) උදෑසන ගනේවැල්පල වනජීවි නිළධාරීන් සොයාගෙන තිබේ.
 
 කිසියම් පිරිසක් පිරිසක් හෝ පුද්ගලයෙකු වෙඩි තැබීම හේතුවෙන් මියගොස් ඇති බව වන ජීවි නිළධාරීහු පවසති.
 
 අද උදෑසන තම  වගාබිම නිරීක්ෂණයට ගිය  ගම්වාසියෙකු  මියගොස් සිටි වන අලියා දැක ඒ පිළිබඳ ගනේවැල්පොල වනජීවි කාර්යාලයට දැනුම්දී  තිබේ.
 
 සිද්ධිය සිදුවූ ස්ථානය පැමිණි වනජීවි නිළධාරීන් සිදුකළ නිරීක්ෂණයකදි අවරැදු 45 ක් පමණ වන පිරිමි සතෙකු බව හදුනාගෙන තිබේ. වන අලියාගේ හිස ප්‍රදේශයට හා පිටුපස ප්‍රදේශයට වෙඩි පහර කිහිපයක් වැදි තිබූ බවත් මෙම වල් අලියා ඊයේ (29) සවස මිය යන්නට ඇති බවත් වනජීවි නිළධාරීහු සැකපල කරති. හිසට එල්ල වී තිබූ එක් වෙඩි පහරක් වන අලි‍යාගේ මුඛය ප්‍රදේශයෙන් මතුවී තිබිණි.
 
 
මිය ගිය වන අලියාගේ පශ්චාත් මරණ පරීක්ෂණ කටයුතු අනුරාධපුර ප්‍රදේශය භාර පශු වෛද්‍ය චන්දන ජයසිංහ මහතා විසින් සිදු කරන අතර අපරාධය සිදු කළ පුද්ගලයන් අත් අඩංගුවට ‍‍ගෙන අවශ්‍ය නිතිමය කටයුතු සිදුකරන බව වනජීවි නිළධාරීහු පැවසීය.