(බිමල් ශ්‍යාමන් ජයකොඩි සහ සමන් කාරියවසම්)
 
අධිකරණ දෙකකින් වරෙන්තු නවයක් ලද පුද්ගලයකු,  අද(30) කළුතර දකුණ කෝලාන හන්දියේදී අත්අඩංගුවට ගත් බව කළුතර දිසා අපරාධ ඒකකය කියයි.

කළුතර ප්‍රදේශයේ නිවසකින් රුපියල් ලක්ෂ 30කට අධික දේපල සොරාගැනීමක් සම්බන්ධයෙන් මොහු අත්අඩංගුවට ගෙන ඇත.
 
සැකකරු කළුතර දකුණ පදිංචි 23 හැවිරිදි අයෙකි.
 
එම පුද්ගලයා සොරාගත් යතුරු පැදියක්, විදුලි උපකරණ, අත් ඔරලෝසු,  රන් භාණ්ඩ, මංගල සාරි, ඉමිටේෂන් ආභරණ පොලිසිය බාරයට ගෙන ඇත.
 
කළුතර නිවාස 8ක් සහ පානදුර නිවසකට ඇතුළු වී දේපළ සොරාගැනීම සම්බන්ධයෙන් මීට මාස කිහිපයකට පෙර අත්අඩංගුවට ගෙන, අධිකරණ ඇප මත සිටි සැකකරු ඒ සඳහා පැවති නඩු වෙනුවෙන් කළුතර හා පානදුර අධිකරණවල පෙනී නොසිටීම හේතුවෙන් වරෙන්තු නිකුත් කර තිබූ බව පොලිස් නිලධාරියෙක් පැවසීය.
 
සැකකරු කළුතර කෝලාන හන්දියේ සැරිසරන බවට කළුතර දිසා අපරාධ ඒකකය ලද තොරතුරත් අනුව අත්අඩංගුවට ගෙන ඇත. එම අවස්ථාවේ සැකකරු සතුව ඉස්කුරුප්පු නියනක් හා රුපියල් 25,000ක වටිනා චෙක්පත් දෙකක් තිබී ඇතැයි පොලිසිය කියයි.
 
සොරාගත් යතුරුපැදිය කළුතර හා සෙල්ල කතරගම පදිංචි දෙදෙනෙකුගේ මාර්ගයෙන් වැලිමඩ ප්‍රාදේශීය සභා මන්ත්‍රීවරයකුට විකුණා තිබියදී සොයාගත් බව පොලිසිය කියයි. සොරාගත් අනෙකුත් දේපළ සැකකරුගේ නිවසේ සඟවා තිබියදී සොයාගෙන ඇත.