(ලලිත් නවරත්න)
 
හලාවත පුත්තලම මාර්ගයේ මුන්දලම ප‍්‍රදේශයේදී ටිපර් රථයක ත‍්‍රිරෝද රථයක් ගැටීමෙන් වූ අනතුරකින්, ත‍්‍රිරෝද රථයේ ගමන්ගත් පුද්ගලයෙකු මියගොස් දෙදෙනෙකු බරපතල තුවාල ලබා පුත්තලම රෝහලට ඇතුළත් කර ඇති බව මුන්දලම පොලීසිය පවසයි.
 
මියගොස් ඇත්තේ මීගමුව පිටිපන පදිංචි මිහිදුකුලසූරිය ජුසේ ශාන්ති ප‍්‍රනාන්දු නැමති 56 හැවිරිදි තිදරු පියෙකි.
 
ත‍්‍රිරෝද රථයේ ගමන්ගත් තවත් කාන්තාවකගේ තත්වය බරපතල බව රෝහල් ආරංචි මාර්ග පවසයි.
 
ත‍්‍රිරෝද රථය හලාවත සිට පුත්තලම දෙසට ගමන්කර ඇති අතර ටිපර් රථය පුත්තලම දෙස සිට හලාවත දෙසට ගමන්කර ඇත. ටිපර් රථය කොළඹ සිට කසළ පටවාගන පුත්තලම අරුවක්කාලු කුණු කසලාංගනයට කුණු බහා නැවත කොළඹ දක්වා අධික වේගයෙන් ගමන් කර ඇති අතර, රියදුරුට රථය පාලනය කරගත නොහැකිව ත්‍රිරෝද රථයේ ගැටී ඇත.
 
ත්‍රිරෝද රථයේ පැමිණි පිරිමි පුද්ගලයින් දෙදෙනෙක් සහ එක් කාන්තාවක  මීගමුව පිටිපන පදිංචිකරුවන් වන අතර ඔවුන් කට්ටකඩුව ප‍්‍රදේශයේ දේවස්ථානයකට යන අතරතුරදී මෙම අනතුර සිදුව ඇත.
 
අනතුරක් සම්බන්ධයෙන් ටිපර් රථයේ රියදුරු මුන්දලම පොලීසිය  අත්අඩංගුවට ගෙන ඇත.

(ඡායාරූප - හිරාන් ප්‍රියංකර ජයසිංහ)