රොමේෂ් මධුෂංඛ     
                   
යාපනය අරියාලෙයි ප්‍රදේශයේ වැලි ජාවාරම්කරුවන් අත්අඩංගුවට ගැනීමට යාමේදී පොලිස් විශේෂ කාර්ය බළකා සෙබළුන්ට පහර දුන් කාන්තාවන් දෙදෙනා ඇතුළු 6 දෙනෙකු අද (18) යාපනය අධිකරණයට ඉදිරිපත් කිරීමෙන් පසුව ලබන අප්‍රේල් 1 වැනි දා දක්වා බන්ධනාගාර ගත කරන ලෙසට යාපනය මහෙස්ත්‍රාත් එස්.සදීස්කරන් මහතා නියෝග කර සිටියේය.

අරියාලෙයි ප්‍රදේශයේදී වැලි ජවාරම්කරුවන් අත්අඩංගුවට ගැනීමට යාමේදී ඇති වූ නොසන්සුන්තාවයේ දී ජාවාරම්කරුවන්ගේ පහරදීමෙන් රෝහල් ගත කෙරුණු පොලිස් විශේෂ කාර්ය බළකා සෙබලුන් තිදෙනා ද අද දහවල් වන විට රෝහලෙන් පිටත්ව ගොස් ඇත.

මේ අතර අරියාලෙයි ප්‍රදේශයේදී නොසන්සුන්තාවය ඇතිවූ ප්‍රදේශය ඇතුළු මාර්ගයන්හි පොලීසිය හා පොලිස් විශේෂ කාර්ය බළකාය විසින් ආරක්ෂාව දැඩි කර තිබේ.

වැලි ජාවාරම්කරුවන් අත්අඩංගුවට ගැනීම සඳහාද පුළුල් සෝදිසි මෙහෙයුමක් ආරම්භ කිරීමටද යාපනය පොලිස් විශේෂ කාර්ය බළකා කඳවුරු නිලධාරීන් විසින් පියවර ගෙන ඇත.