(මොහොමඩ් ආසික්)

මධ්‍යම පළාතේ පිහිටි ආයතනයන වලට පත් කෙරෙන සභාපතිවරුන් හා අධ්‍යක්ෂ මණ්ඩල සමාජිකයන් තම වගකීම් නිසි ලෙස ඉටු නොකළහොත් ඔවුන් වෙනුවට වෙනත් නිලධාරීන් පත් කිරීමට තමා පසු බට නොවන බව මධ්‍යම පළාත් ආණ්ඩුකාර ලලිත් යූ.ගමගේ මහතා කීය.

මධ්‍යම පළාත් පුස්තකාල සේවා මණ්ඩලය, සමූපකාර සේවක කොමිසන් සභාව, මගී ප්‍රවාහන සේවා අධිකාරිය, මාර්ග සංවර්ධන අධිකාරිය  යන ආයතන සඳහා  පළාත් ආණ්ඩුකාර කාර්යාලයේදී  නව අධ්‍යක්ෂවරුන් පත් කිරීමෙන් අනතුරුව ආණ්ඩුකාර නිතීඥ ලලිත් යූ.ගමගේ මහතා එසේ කීය.

මෙහිදී නව අධ්‍යක්ෂකවරුන් 11 දෙනෙකු ආණ්ඩුකාරවරයා අතින් පත්වීම් ලිපි ලබාගත් අතර පත්වීම් ලබාදීමෙන් පසු පිරිස අමතමින් ආණ්ඩුකාරවරයා තව දුරටත් මෙසේ පැවසීය.

‘‘මෙම ආයතනය  කටයුතු පසුගිය කාලයේදී නිවැරදි ආකාරයෙන් සිදු වුයේ නැති බව අප දන්නා කරුණක්. ඔබ අධ්‍යක්ෂකවරුන් වශයෙන් පත්වන මෙම ආයතන අප පළාතේ ඉතා සුවිශේෂ ආයතන බව සිහියේ තබා ගත යුතුයි.  

එම නිසා අධ්‍යක්ෂකවරුන් වශයෙන් ඔබ ආයතනයන්හී ගනු ලබන තීරණ සම්බන්ධයෙන් විශාල වගකීමක් බුද්ධිමත් ඔබ වෙත පැවරෙනවා. විශේෂයෙන් සභාපතිවරයාට හිතු මනාපෙට තීරණ ගැනීමට ඉඩ තබන්න එපා.  

කිසියම් අවස්ථාවක සභාපතිවරයා හෝ අධ්‍යක්ෂක මණ්ඩල‍ය තමාට පැවරෙන වගකීම් පැහැර හරින බව නිරීක්ෂණය වුවහොත් ජනතාව වෙනුවෙන් එම පුටු වලට නව නිලධාරීන් පත්කිරීමට මා දෙපාරක් හිතන්නේ නැහැ. ඒ මන්ද  ජනාධිපති ගෝඨාභය රාජපක්ෂ මහතාගේ සෞභාගයේ දැක්ම මාවත ඔස්සේ ගමන් කිරීමේදී වැඩ මග හරින, වංචා දූෂණ සිදුකරන නිලධාරීන්ව ආරක්ෂා කිරීම කිසිසේත්ම සිදුනොවන බැවින්ය.‘‘

මෙම අවස්ථාවට පළාත් ආණ්ඩුකාර ලේකම් කේ.ජී. උපාලි රණවක, හිටපු පළාත් සභා මන්ත්‍රී එස්.බී. රත්නායක ඇතුලු මහත්ම මහත්මීහු පිරිසක් ද එක්වූහ.