(රංජිත් රාජපක්ෂ)
                        

නුවරඑළිය කලාප අධ්‍යාපන කාර්යාල යටතේ පාලනය වන හැටන් කොටගල කෙම්බ්‍රිජ් විද්‍යාලයට මැක්කන් විශේෂයක් බෝවීමෙන් අද (24) එහි පන්ති කාමරයක් තාවකාලිකව වසා දැමූ බව කොටගල මහජන සෞඛ්‍ය පරීක්ෂක කාර්යාලයේ මහජන සෞඛ්‍යය පරීක්ෂක පී. නරේන්ද්‍රකුමාර් මහතා පැවසීය.

එම විදුහලේ 7 වසරේ  පන්ති කාමරය තුළ ගේ කුරුල්ලන් විශාල වශයෙන් කූඩු බැඳ ඇති බවත්, එම කුරුල්ලන්ගෙන් බෝ වූ මැක්කන් පන්ති කාමරය තුළ වූ ඩෙස් පුටුවල සහ බිත්තිවලට බෝ වී ඇති බවත් මහජන සෞඛ්‍ය පරීක්ෂකවරු පවසති.

මැක්කන් විශේෂය නිසා එම පන්ති කාමරයේ අධ්‍යාපනය ලබමින් සිටි ළමුන් 43 දෙනෙකුගෙන් 21 දෙනෙකු අසාදනය වී අද උදෑසන කොටගල ප්‍රාදේශීය රෝහල වෙත ඇතුළත් කර ඇත.

එම සිසුන් මේ වනවිට ප්‍රතිකාර ලබා රෝහලෙන් බැහැරව ගොස් ඇති බව මහජන සෞඛ්‍යය පරීක්ෂකවරයා කීය.

පන්ති කාමරය තුළ බෝ වී ඇති මැක්කන් විශේෂය විනාශ කිරීම සඳහා කෘමිනාශක දියරයක් හෙට (25) ඉසීමට කටයුතු කර ඇති බවත්, ඉන් පසු පන්ති කාමරය පරීක්ෂා කර බලා ලබන 27 වැනි දා විවෘත කිරීමට කටයුතු කරන බවත් මහජන සෞඛ්‍යය පරීක්ෂකවරයා වැඩිදුරටත් කියා සිටියේය.