(උපාලි ආනන්ද)

වයස  අවුරුදු 14 ට අඩු බාල වයස්කාර පිරිමි දරුවෙකු බරපතල ලෙස අපයෝජනය කිරීමේ සිද්ධියක් සම්බන්ධයෙන් අනුරාධපුර මහාධිකරණය හමුවේ අධි චෝදනා ලබා සිටි හිටපු පොලිස් සැරයන්වරයකු වරදකරු බවට නිගමනය කළ උතුරුමැද පළාත් බද මහාධිකරණ විනිසුරු  සහන් මාපා බංඩාර මහතා ඔහුට  වසර 14 කුත් මාස 6 ක  බරපතල වැඩ සහිත සිර දඬුවමක්  අද (14) නියම කළේය.

ඊට අමතරව පැමිණිලිකාර දරුවාට මුදලින් රුපියල් පනස් දහසක වන්දියක් ගෙවන ලෙසටද විත්තිකරුට තවදුරටත් නියෝග කළ මහාධිකරණ විනිසුරුවරයා එම වන්දි මුදල නොගෙවන්නේ නම් තවත් මාස 6 ක සිර දඩුවමකටද විත්තිකරු යටත් කෙරිණි.

මෙසේ දඩුවම් නියම වූයේ මහියංගනය සොරබොරවැව පදිංචි ආර් එම්  ජයරත්න බංඩාර නැමැති හිටපු පොලිස් සැරයන්වරයකුටය.

මෙම පොලිස් සැරයන්වරයා සක‍්‍රීය පොලිස් සේවයේ යෙදී සිටින අතරතුර මෙම වරද සිදු කර ඇති බව අධිකරණ නඩු විභාගයේදී අනාවරණ වීමෙන් පසුව ඔහු පොලිස් සේවයෙන් ඉවත් කර ඇත මෙම නඩුවේ ලඝු නොවන මූලික විභාගය කැබිතිගොල්ලෑව මහේස්ත‍්‍රාත් අධිකරණය හමුවේ  පැවැති අතර වැඩිදුර විභාගය සදහා අනුරාධපුර මහාධිකරණයට යොමු කර තිබිණි.