(කාංචන කුමාර ආරියදාස)

වව්නියාව සෙට්ටිකුලම ප්‍රදේශයේ සිට මාවනැල්ල ප්‍රදේශයට බලපත්‍ර නීති උල්ලංඝනය කරමින් ගවයන් ප්‍රවාහනය කරන ලොරි රථයක් අද (19) අලුයම දඹුල්ල නගරයේ දී සැකපිට අත්අඩංගුවට ගෙන තිබේ.

මස් පිණිස ඝාතනය කිරීමට මෙම සතුන් රැගෙන යන බවත් හයදෙනෙකු ප්‍රවාහනය කිරීමට ඇති ලොරි රථයක ගවයන් 20දෙනෙකු පටවාගෙන යන බවට දඹුල්ල පොලිසියට ලැබුණු තොරතුරක් මත සැකකරුවන් අත්අඩංගුවට ගෙන ඇත.

මෙම පුද්ගලයින් මීට පෙර ද ඉතා සූක්ෂම ලෙස විකල්ප මාර්ග ඔස්සේ බලපත්‍ර නීති උල්ලංඝනය කරමින් විවිධ ප්‍රදේශවලට සතුන් ප්‍රවාහනය කර ඇති බවට පොලිසිය සිදුකළ විමර්ශනවලදී අනාවරණය වී ඇත.

අත්අඩංගුවට ගත් සතුන් අතර පිරිමි සතුන් 10 දෙනෙකු ගැහැණු සතුන් 10 දෙනෙකු වන බවද පොලිසිය කියයි.

මෙම සතුන් වව්නියාව  සෙට්ටිකුලම ප්‍රදේශයේ පටවා තිබෙන බවත් ඇතැම් විට  ප්‍රධාන මාර්ගයේ රාත්‍රී කාලයේ නිදා සිටින ගවයන් පැටෙව්වේ ද යන්න විශේෂ පරීක්ෂණයක් පැවැත්වීමට නියමිතය.

මේ ලොරි රථය සම්පුර්ණයෙන් ආවරණය කර යාපනයේ ලොරියක් ලෙස පෙනුම වෙනස් කර ගවයන්ට දේවත්වයෙන් සලකන චිත්‍ර ඇඳ ඇති බව පොලිසිය පවසයි.