(එස් .ඩි .කොඩිකාර )

බලපත්‍ර රහිතව දෙනියාය ප්‍රදේශයේ සිට වැලිපැන්න ප්‍රදේශය දක්වා  එළ ගවයින් 5 දෙදෙනෙකු  ප්‍රවාහනය කළ ලොරි රථයක් සැකකරුවන් සිව් දෙනකු සමඟ අද (13) කොටපොල පොලිස් විශේෂ කාර්ය බලකා කඳවුරේ නිලධාරීන් සහ කොස්මෝදර  පොලිසියේ නිලධාරීන් එක්ව අත්අඩංගුවට ගත් බව පොලිසිය කියයි.

මෙසේ අත්අඩංගුවට ගෙන ඇත්තේ වැලිපැන්න ප්‍රදේශයේ පදිංචි  පුද්ගලයන් තිදෙනෙකු හා දෙනියාය ප්‍රදේශයේ පදිංචි වයස අවුරුදු 24,25,36,55  අතර වයස් කාණ්ඩවල පදිංචි පුද්ගලයන් බව පොලීසිය කියයි.

අත්අඩංගුවට ගන්නා ලද එළ ගවයින් 5 දෙනා අතර  මාස 8ක  ගව පැටියකු ද සිටින බව පොලිසිය සඳහන් කරන අතර  මෙම එළ ගවයින් දෙනියාය බෙවරලිය ප්‍රදේශයේ සිට වැලිපැන්න ප්‍රදේශය දක්වා රැගෙන යන බවට ප්‍රදේශවාසීන් පොලිස් විශේෂ කාර්ය බළකා  කඳවුරට ලබා දුන් තොරතුරක් මත මෙම වැටලීම සිදු කෙරිණි.

අත්අඩංගුවට ගත් ගවයින් සහ ලොරි රථය කොස්මෝදර පොලිස්  ස්ථානයට රැගෙන යාමෙන් පසු  බෙවරලිය නාථගල  ප්‍රදේශයේ එළ ගවයෙකු නැති වූ  පුද්ගලයෙකුගෙ ගවයකු එම ලොරි රථයේ සිටියදී  හඳුනාගෙන ඇති අතර ඒ සම්බන්ධයෙන් පොලීසියට පැමිණිල්ලක් ලැබී ඇති බව පොලිසිය කියයි.

අත්අඩංගුවට ගන්නා ලද ගවයින් සහ සැකකරුවන් මොරවක  මහේස්ත්‍රාත් අධිකරණයට (15) වැනිදා ඉදිරිපත් කිරීමට නියමිතව ඇති අතර සිද්ධිය සම්බන්ධයෙන් කොස්මෝදර පොලීසිය වැඩිදුර පරීක්ෂණ පවත්වයි.