(බිමල් ශ්‍යාමන් ජයසිංහ)
 
ගල්කිස්ස පන්සල පාර අසළදී පොලිස් සැරයන්වරයකුට පහරදුන් බීමත් පුද්ගලයන් සයදෙනෙකු අද(02) අත්අඩංගුවට ගත් බව ගල්කිස්ස පොලිසිය කියයි.
 
අත්අඩංගුවට ගත් පිරිස පිරිස වෘත්තියෙන් ලී මෝල් ව්‍යාපාරිකයන් බව පොලිසිය පවසයි.
 
මෝටර් රථයක් අපරික්ෂාකාරීව ධාවනය වන බවට රියදුරන් කිහිපදෙනෙකු දෙහිවල පොලිසියට දැනුම් දී තිබූ අතර, දෙහිවල පොලිසිය ඒ බව ගල්කිස්ස පොලිසිය දැනුවත් කර තිබිණි.
 
කොළඹ සිට ගල්කිස්ස දෙසට පැමිණෙමින් තිබූ මෝටර් රථය නැවතීමට පොලිස් නිලධාරීන් සංඥා කර තිබූ අතර, අණ නොතකා එය ධාවනය කර තිබිණි. මෝටර් රථය බස් රථයක ගැටී නතර වී ඇති අතර රියදුරුගෙන් සැරයන්වරයා මෝටර් රථ බලපත්‍රය ඉල්ලූ විට ඔවුන් පහරදී ඇතැයි පොලිසිය කියයි.
 
අත්අඩංගුවට ගත් හයදෙනාගෙන් පුද්ගයන් පස්දෙනෙකු සැරයන්වරයාට පහරදෙන විට අනෙක් පුද්ගලයා ජංගම දුරකතනයෙන් එය වීඩියෝ ගතකරමින් සිටි බව පොලිසිය පවසයි.
 
පහර කෑ සැරයන්වරයා කළුබෝවිල ශික්ෂණ රෝහලේ ප්‍රතිකාර ලබමින් සිටී.
 
සැකකරුවන් අධිකරණයට ඉදිරිපත් කිරීමට නියමිතය.