(බිමල් ශ්‍යාමන් ජයසිංහ)
 
බණ්ඩාරගම ජාතික පාසල අසළ පදික මාරුවේදී තරුණයකු මරණයට පත්කරමින් පලාගිය කැබ් රථයේ රියදුරු අද(16) අත්අඩංගුවට ගත් බව බණ්ඩාරගම පොලිසිය කියයි.

සැකකරු කඩුවෙල වැලිවිට පදිංචි 57 හැවිරිදි අයෙකු බව පොලිසිය කියයි. එම කැබ් රථය අධ්‍යාපන අමාත්‍යංශයට අයත් එකක් බව ද පොලිසිය කියයි.

මිය ගිය තරුණයා නොච්චියාගම පහළ හල්මිල්ලෑව පදිංචිව සිටි අයකු බවද, ලබන වසරේ උසස්පෙළ විභාගයට පෙනී සිටීමට නියමිතව සිටි අයකු බවද පැවසේ.

ආර්ථික දුෂ්කරතා බණ්ඩාරගම ගල්කුඩේ ප්‍ර දේශයේ පෞද්ගලික ආයතනයක රැකියාවට යමින් සිටි එම තරුණයා ඊයේ (15) අලුයම රැකියාවට යමින් සිටියදී අනතුරට ලක්ව තිබිණි.

තරුණයා අනතුරට ලක් කරමින් පලා ගිය කැබ් රථය  ඒ අසළ පාසලේ වූ සී.සී.ටී.වී. කැමරාවල සටහන්ව තිබිණි. එසේ වුවත් එහි අංකය පෙනෙන්ට නොවූ බැවින් පොලිස් නිලධාරීන්ට රියදුරු සෙවීම දැඩි අභියෝගයක්වී තිබිණි.

අද(16) බණ්ඩාරගම පොලිසියේ රථවාහන අංශයේ ස්ථානාධිපති ඇතුළු නිලධාරීන් රාජකාරියේ යෙදී සිටියදී සුදුපැහැ කැබ් රථයක් කලුතර සිට බණ්ඩාරගමට ධාවනය වනු දැක නවතා රියදුරුගෙන් කළ මූලික පරීක්ෂණවලදී ඔහු තමා අතින් අනතුර වූ බව පිළිගෙන ඇත.