(හේමලතා ඩි .හේවගේ)                                             

වයඹ පළාතේ ඇතැම් ප‍්‍රදේශයන්හි  පවතින දැඩි  නියඟය පිළිබඳව නොතකා  මෙවර යල් කන්න අස්වැද්දවීමට ගොවීන් තීරණය කර තිබේ.  

කුරුණෑගල දිස්ත‍්‍රික්කයේ ප‍්‍රදේශ කිහිපයකට පමණක් කඩින් කඩ වර්ෂාව  ලැබුණත් නිසි වර්ෂාපතනයක් මේ දක්වා නොලැබීමෙන් ගොවීන් වැයකළ මුදල් සහ ශ‍්‍රමය පිළිබඳව දැඩි කනස්සල්ලට  පත්ව ඇති බවද  පෙන්වා දෙන ගොවීහු පන්නල ප‍්‍රදේශීය ලේකම් කොට්ඨාශයේ වෙල්පල්ල යක්විල හමන්ගල්ල යන ගොවිජන සේවා වසම් වලට අයත් කුඹුරු අක්කර අටසීයක පමණ ගොවීහු පීඩාවට පත්ව ඇතැයි කියති.  

මේ සම්බන්ධයෙන් පන්නල ප‍්‍රදේශීය ලේකම් සමන්ත බණ්ඩාර වික‍්‍රමරත්න මහතාගෙන් කළ විමසීමේදී  ඔහු කීවේ මෙවර යල් කන්නයේ කුඹුරු වගාකිරීමේ  ඉතා අඩු ප‍්‍රතිශතයක් පවතින බවත් , කොට්ඨාසය තුළ තවම සිදුවනුයේ ගොවීන් කුඹුරුවල මුලික සැලසුම් පමණක් සිදු කරන බවත්ය.නිසි වර්ෂාපතනය නොලැබුණහොත් කුඹුරු විනාශවී යාමේ අවධානමක්ද ඇතැයි ඔහු සඳහන් කළේය.