(ටී.කේ.ජී.කපිල)

නීතිවිරෝධී ලෙස ඩුබායි සිට මෙරටට ගෙන ආ දුම්වැටි තොගයක් සමඟ ශ්‍රී ලාංකික ගුවන් මගියෙකු අද (10) කටුනායක ගුවන් තොටුපළ පැමිණීමේ පර්යන්තයේ දී රේගු නිලධාරීන් විසින් අත්අඩංගුවට ගෙන ඇති බව රේගු මාධ්‍ය ප්‍රකාශක අතිරේක රේගු අධ්‍යක්ෂ ජනරාල් සුනිල් ජයරත්න මහතා පැවසීය.

අත්අඩංගුවට ගත් පුද්ගලයා කුරුණෑගල , මාවතගම ප්‍රදේශයේ පදිංචි 33 හැවිරිදි ව්‍යාපාරිකයෙකු බව සුනිල් ජයරත්න මහතා කීය.

ඩුබායි සිට පැමිණි එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් මෙම පුද්ගලයා කටුනායක ගුවන් තොටුපළ වෙත පැමිණ තිබේ.

අත්අඩංගුවට ගත් පුද්ගලයා රැගෙන ආ ගමන් මලු තුළ දුම්වැටි 27,600 ක් අඩංගු  දුම්වැටි කාටූන් 138 ක් තිබී සොයා ගත් බවත් ඒවායේ වටිනාකම රුපියල් 13,80,000 ක් පමණ වන බවත් රේගු මාධ්‍ය ප්‍රකාශක සුනිල් ජයරත්න මහතා පැවසීය.