(එම්.සුසිල් ප්‍රියන්ත සහ ඩී.ජේ.විජේසිංහ)

පොලු මුගුරුවලින් පහරදී ඝාතනය කරන ලදැයි සැක සිතිය හැකි පුද්ගලයකුගේ මළ සිරුරක් අද (9) අලුයම් කාලයේදී පිටිගල කරව්ව වෙල්‍ යායේ දමා තිබියදී සොයාගත් බව පිටිගල පොලීසිය කියයි.

මෙසේ සොයා ගනු ලැබූවේ පිටිගල මන්නගොඩ පදිංචි නිහාල් අතුකෝරළ නමැති පනස්හත් හැවිරිදි තිදරු පියෙක් බව පොලීසිය සඳහන් කරයි.

මිය ගිය තැනැත්තා ඊයේ (8) රාත්‍රියේ නිවසින් පිටව ගොස් ඇති බවත් ඔහු මත්පැන් පානය කරමින් සිටින අවස්ථාවේදී ඇතිවූ කතාවක් දුර දිග යාමෙන් පසු ඔහුට පිරිසක් පොලු මුගුරුවලින් පහරදී ඝාතනය කොට මේ වෙල් යායේ දමා යන්නට ඇති බවට සැකකරන බවද පොලීසිය කියයි.

මිය ගිය අය රාත්‍රී නිවසට නොපැමිණීම පිළිබදව සොයා බැලීමේදී ඔහුගේ සිරුර කරව්ව වෙල් යායේ තිබියදී හමුවී ඇති බවත් ඒ පිළිබදව තමන්ට දැන්වීමෙන් පසු ඔහුගේ සිරුර සොයා ගත් බවත් පොලීසිය කියයි.

වෙල් යායේ තිබියදී සොයා ගැණුනු මේ පුද්ගලයාගේ සිරුරේ පොලු මුගුරුවලින් පහරදුන්නේ යයි සිතිය හැකි තුවාල ද දක්නට ලැබෙන බවත් පොලීසිය කියයි.

මේ සම්බන්ධයෙන් මහේස්ත්‍රාත් පරීක්ෂණය අද (9) පැවැත්වීමට නියමිතය.