රොමේෂ් මධුෂංඛ
 
පවතින අධික වර්ෂාව හේතුවෙන් උතුරු පළාත තුළ පවුල් 436 කට අයත් පුද්ගලයින් 1508  දෙනෙකු ආපදාවන්ට පත්ව ඇති බවට ආපදා කළමනාකරණ මධ්‍යස්ථානයේ සංඛ්‍යා ලේඛන මගින් පෙන්වා දෙයි.

මේ අනුව අද (09) වන විට ගංවතුර හේතුවෙන් වැඩිම පිරිසක් ආපදාවන්ට පත්ව ඇත්තේ කිලිනොච්චිය දිස්ත්‍රික්කයේ වන අතර එය පවුල් 228 කට අයත් පුද්ගලයින් 836 දෙනෙකු වෙයි.

ඊට අමතරව මුලතිව් දිස්ත්‍රීක්කයේ පවුල් 202 කට අයත් පුද්ගලයින් 647 දෙනෙකු ද වව්නියාවේ පවුල් 5 කට අයත් පුද්ගලයින් 21 දෙනෙකු ද යාපනය දිස්ත්‍රික්කයේ පවුලකට අයත් පුද්ගලයින් සිව් දෙනෙකු ද විපතට පත්ව ඇති බවට ආපදා කළමනාකරණ මධ්‍යස්ථානය විසින් පෙන්වා දෙයි.

ගංවතුර ගැලීම හේතුවෙන් වැඩිම පිරිසක් විපතට පත්ව සිටින කිලිනොච්චිය කරච්චි ප්‍රාදේශීය ලේකම් කොට්ඨාසයට අයත් තිරුවියාරු හා ආනන්දපුරම් ප්‍රදේශයන්හි ගංවතුරින් නිවාස 16 ක් යට වී ඇති අතර විපතට පත් 300 ක් පමණ දෙනා වෙනුවෙන් කිලිනොච්චිය ආරක්ෂක සේනා ආඥාපති තුමන්ගේ අධීක්ෂණයන් පරිදි 7 වැනි පාබල රෙජිමේන්තුවෙන් යුද හමුදා සෙබලුන් විසින් වියළි ආහාර සහ වෛද්‍ය පහසුකම් ලබා දීමට පියවර ගෙන ඇත.