(දිලීප් ජයසේකර)

සුරියවැව සමාජසේවාපුර කෙසෙල් වගාවක් තුළ ඉතා රහසිගත ලෙස නිධානයක් හාරමින් සිටි සැකකරුවන් තිදෙනෙකු සුරියවැව පොලිස් විශේෂ කාර්ය බලකා නිලධාරීන් විසින් අද (10) අත්අඩංගුවට ගෙන තිබේ.

මෙලෙස අත්අඩංගුවට ගෙන ඇත්තේ සුරියවැව සමාජසේවා පුර ප්‍රදේශයේම පදිංචි 49,44 හා 32 වයස්වල පසුවෙන සැකකරුවෝ තිදෙනෙකි..

සැකකරුවන් තිදෙනා දින කිහිපයක් තිස්සේ පුද පුජා පවත්වමින් විටින් විට නිධානයක් ගැනීම සඳහා මෙම ස්ථානයේ අඩි 15ක පමණ යටට වලක් හාරා තිබේ.

සුරියවැව පොලිස් විශේෂ කාර්ය බලකා නිලධාරීන් ලද තොරතුරකට අනුව අද (10) සිදු කළ වැටලීමකදී සැකකරුවන් තිදෙනා අත්අඩංගුවට ගෙන ඇත.

සැකකරුවන් තිදෙනා සමඟ උදලු දෙකක්,වතුර මෝටරයක්,වයර් කෝඩ් එකක්,තාච්චි දෙකක්, ගල් විදින කටුවක්, පුද පුජා භාණ්ඩ රැසක්ද එම ස්ථානයේ තිබී අත්අඩංගුවට ගෙන තිබේ.

අත්අඩංගුවටපත් සැකකරුවන් තිදෙනා වැඩිදුර විමර්ෂණ කටයුතු සඳහා සුරියවැව පොලිසියට බාර දී ඇති අතර සැකකරුවන් හම්බන්තොට මහේස්ත්‍රාත් අධිකරණයට ඉදිරිපත් කිරිමට නියමිතය.