(ජේ. කේ. එල්. චාමින්ද)
 
උරස් කුහරයේ හා උදර කුහරයේ මහා ධමනිය ප්‍රසාරණය වී තිබූ පුද්ගලයෙකුට සැත්කමක් කර එම පුද්ගලයාගේ ජීවිතය බේරගැනීමට කරාපිටිය ශික්ෂණ රෝහලේ  රුධිරවාහිනී හා අවයව බද්ධ කිරීම පිළිබඳ විශේෂඥ  ශල්‍ය වෛද්‍ය රංජුක උබේසිරි මහතා ඇතුළු  වෛද්‍ය කණ්ඩායමක් සමත්වූහ.
 
මෙම පුද්ගලයා 70 හැවිරිදි වියේ පසුවන්නෙකු බවද, ඔහුගේ උරස් කුහරයේ හා උදර කුහරයේ මහා ධමනිය, මහා ප්‍රාචීරය හරහා සෙන්ටිමීටර් හතක් පමණ ප්‍රසාරණය වී තිබූ බවද උබේසිරි මහතා කීවේය.
 
නහරය පුපුරායාමට ලක්වූවා නම් මෙම පුද්ගලයා අනිවාර්යෙන්ම මියයන බවද  මෙය ඉතා අවදානම් සැත්කමක් බවද මෙවැනි සැත්කමක් දකුණු පළාතේ රෝහලක කළ පළමු අවස්ථාව මෙය බවද ලංකාවේ සිදුකළ සැත්කම් අතුරින් සාර්ථක වී ඇත්තේ  සැත්කම් කිහිපයක් පමණක් බවද  විශේෂඥ ශල්‍ය වෛද්‍යවරයා පැවසීය.
 
කරාපිටිය ශික්ෂණ රෝහලේ හෘද හා උරස් කුහර ඒකකය තුළ මෙකී  ශල්‍යකර්මය කර ඇති අතර ඒ සඳහා පැය 6ක පමණ කාලයක් ගතවී ඇත. 
 
ශල්‍යකර්මයට ලක් වූ රෝගියා මේවනවිට යහපත් සෞඛ්‍ය තත්වයෙන් පසුවේ.

මෙම සැත්කම පිළිබඳව අදහස් දක්වමින් විශේෂඥ ශල්‍ය  වෛද්‍ය රංජුක උබේසිරි මහතා මෙසේ පැවසිය.
 
 “හෘදය වස්තුවෙන් පටන් අරන් අත්වලට හා මොළයට රුධිරය සපයන ප්‍රධාන ධමනියක් තමයි මහා ධමනිය. මේ ධමනිය  උරස්කුහරය හරහා  උදර කුහරයට එනවා. මේ ධමනියෙන් තමයි අක්මාවට, අමාශයට හා ඉතුරු කොටස්වලට රුධිරය සපයන්නේ. ඉන්පසු නහර හරහා මහා බඩවැල් හා වකුගඩුවලට ලේ සපයනවා.  පසුව තමයි පාදවලට බෙදෙන්නේ.
 
මේ පුද්ගලයාගේ උරස්කුහරයේ හා උදර කුහරයේ  මහාධමනිය අනිකුත් නහරත් සමඟ ප්‍රසාරණය වෙලා  තිබුණා මහා ප්‍රාචිරය හරහා. මහා ධමනිය විවෘත කරලා එහි බද්ධ කිරීමක් සිදු කළා. පසුව සුශුම්නාවට යන නහර බද්ධ කළා. බඩවැල්වලට යන නහර බද්ධ කළා.  ඒ සඳහා හෘද හා  උරස් කුහර පිළිබඳ විශේෂඥ ශල්‍ය වෛද්‍ය  ට්‍රෝලුෂා  හරිස්චන්ද්‍ර මහත්මිය හා රිචඩි පර්මින් වෛද්‍යතුමාත් උදව් කළා”  යැයි රංජුක උඹේසිරි මහතා පැවසීය. 
 
නිර්වින්දන වෛද්‍ය  ගිහාන් පියසිරි මහතා ඇතුළු රුධිරවාහිනී  සහ අවයව බද්ධ කිරීමේ ඒකකයේ වෛද්‍යවරු ඇතුළු කාර්ය මණ්ඩලය සැත්කමට දායක වූහ. 

(විශේෂඥ  ශල්‍ය වෛද්‍ය රංජුක උබේසිරි මහතා)