(ශාන්ත චන්ද්‍රසිරි)
 
කොරෝනා වයිරසය ඇතුළු බෝවන රෝග අවදානමට ලක්වෙන ප්‍රජාව සඳහා ප්‍රතිකාරයක් ලෙස දේශීය ඖෂධ භාවිතා කර සකස් කරන ලද විශේෂ පළඳනාවක් මධ්‍යම පළාත් ආයුර්වේද දෙපාර්තුමේන්තුව මගින් නිෂ්පාදනය කර තිබේ.
 
 මෙම විශේෂ ඖෂධ පළඳනාව මධ්‍යම  පළාත තුළ බෙදා හැරීමේ වැඩ සටහන  මධ්‍යම පළාත් ආණ්ඩුකාර  ලලිත් යු. ගමගේ මහතාගේ ප්‍රධානත්වයෙන් අද (23) මධ්‍යම පළාත් ආණ්ඩුකාර කාර්යාලයේදී සිදු කෙරිණි.
 
පෙරුම්කායන් සහ තවත් රසායනික සංයෝග කීපයක්  භාවිතා කරමින් මෙම නව පළඳනාව මධ්‍යම පළාත් ආයුර්වේද දෙපාර්තුමේන්තු මගින් නිෂ්පාදනය කර තිබේ.
 
විශේෂ ඇසුරුමක සකස් කර ඇති මෙම ඖෂධ පැකැට්ටුවෙන් ලබා ගන්නා ද්‍රව්‍ය කපු රෙදි කඩක් භාවිතා කරමින් අතේ හෝ ගෙලේ පැළැදීමෙන් බෝවන රෝග  ආසාදනය වීම වළක්වා ගත හැකි බව මධ්‍යම පළාත් ආයුර්වේද කොමසාරිස් වෛද්‍ය ධම්මික අබේගුණවර්ධන මහතා මෙහෙදී කීය.

මෙම විශේෂ ඖෂධ සංයෝගය ඇතුළත් පැකට්ටුව මධ්‍යම පළාතේ ආයතනයන් වෙත බෙදා හැරීමට  අවශ්‍ය පියවර ගන්නා බව මධ්‍යම පළාත් ආණ්ඩුකාර කාර්යාලය සඳහන් කරයි.