(නිමල කොඩිතුවක්කු)

පෞද්ගලික ප‍්‍රයෝජනය සඳහා ගොඩනැගිල්ලක් ඉදිකිරිම සහ ඒ හා බැඳුණු කාර්යයන් සිදුකිරීමේදී පස් කියුබ් 35ට වඩා අඩු පස් ඉවත් කිරීම සඳහා පවතින බලපත‍්‍රය අහෝසි  කර ග‍්‍රාම සේවා නිර්දේශය මත පමණක් සලකා පස් ප‍්‍රවාහනය කිරීමට අවසර ලබා දෙන බව මහවැලි සංවර්ධන හා පරිසර රාජ්‍ය අමාත්‍ය අජිත් මාන්නප්පෙරුම මහතා ලංකාදිපයට පැවැසීය.

මෙයට පෙර එම බලපත‍්‍ර ලබා ගැනීම සඳහා ප‍්‍රාදේශීය ලේකම්වරයාගේ අනුමැතිය සහ ඉදිකිරීම් සඳහා අනුමත සැළැස්මක් ඉදිරිපත් කළ යුතුව තිබුණි.

එමෙන්ම මාර්ග ඉදිකිරීම, බෝක්කු ඉදි කිරීම් ආදී ඉදිකිරිම් වලදී  පස් කියුබ් 50ට වඩා අඩු පස් ඉවත් කිරීම සඳහා පවතින බලපත‍්‍රය අහෝසි  කරමින් ග‍්‍රාම සේවා නිර්දේශය මත ප‍්‍රදේශීය ලේකම්වරයා විසින් නිකුත් කරන බලපත‍්‍රයක් මත පමණක් සලකා පස් ප‍්‍රවාහනය කිරීමට හැකි වන පරිදි එම බලපත‍්‍රය ලිහිල් කර තිබේ.

මෙයට පෙර එම බලපත‍්‍ර ලබා ගැනීම සඳහා දිස්ත‍්‍රික් ලේකම්, භූ විද්‍යා සමීක්ෂණ හා පතල් කාර්යාංශය , මධ්‍යම පරිසර අධිකාරිය, මහවැලි අධිකාරිය, වන සංරක්ෂණ දෙපාර්තමේන්තුව සහ ශ්‍රී ලංකා පොලිසිය ආදී ආයතන ඇතුළත් දිස්ත‍්‍රික් කමිටුවක් මගින් ඒ සඳහා අනුමැතිය ලබා දිය යුතුව තිබුණි.

පස් කියුබ් 50ට වඩා වැඩි පස් ඉවත් කිරීම සඳහා බලපත‍්‍ර ලබාදිමේ බලය භූ විද්‍යා සමීක්ෂණ හා පතල් කාර්යාංශයට හිමි වන පරිදි  නව නීති සකස් කර  ඇති බවත් ඔහු සඳහන් කළේය.

ජනතාවගේ පහුසුව වෙනුවෙන් විෂය භාර අමාත්‍ය ජනාධිපති මෛත‍්‍රීපාල සිරිසේන මහතා ගේ උපදෙස් මත මෙම පියවර ගත් බවද රාජ්‍ය අමාත්‍යවරයා සඳහන් කළේය.

එමෙන්ම වාණිජ පරමාර්ථයෙන් සිදුකරන පස් කැපීම් ඉවත් කිරීම් සහ ගොඩකිරිම් සඳහා මෙම ලිහිල් කිරීම් අදාළ නොවන බවද මහවැලි සංවර්ධන හා පරිසර රාජ්‍ය අමාත්‍ය අජිත් මාන්නප්පෙරුම මහතා වැඩිදුරටත් පැවැසීය.