ඉන්දියාවේ බෙන්ගංල් ප්‍රාන්තයේ සුන්දර්බාද්හි ෂැලෝ ගඟේ කකුළුවන් අල්ලමින් සිටි කාන්තාවක් බෙංගාල ව්‍යාඝ්‍රයකු විසින් ඇදගෙන ගොස් ඇතැයි ඉන්දීය මාධ්‍ය වාර්තාකරයි.

2014 වර්ෂයේ දී සුන්දර්බාද්හි ව්‍යාඝ්‍රයන් විසින් මිනිසකු ඇදගෙන ගිය හයවැනි අවස්ථාව මෙයයි. සැය සැමියා හා තවත් බෝට්ටුකරුවකු සමග ඇය කකුළුවන් අල්ලමින් සිටිය දී හදිසියේම කඩා පැන්න ව්‍යාඝ්‍රයා ඇය ඩැහැගෙන ඇත.

තම බිරිඳ ව්‍යාඝ්‍රයා විසින් කැලයට ඇදගෙන යනු මහත් භීතියෙන් යුතුව බලාගෙන සිටීමට සිදුවූ බව ඇගේ සැමියා කියයි. ව්‍යාඝ්‍රයා මේ කාන්තාව ඇදගෙන ගිය කැලය හඳුන්වන්නේ පර්ක්හාලි නමිනි. එය කඩොලාන සහිත වනාන්තරයකි.

අනතුර සම්බන්ධයෙන් වනජීවී නිලධාරීන්ට දැනුම් දීමෙන් පසු ඔවුන් ඇය ගැන සොයා බැලුව ද මෙතෙක් කිසිදු සළකුණක් හමුවී නැතැයි ඉන්දියාවේ පොලීසිය පවසයි.

ජුනි මාසයේ දී ද සිය දරුවන් සමග සුන්දර්බාද් වනෝද්‍යානයේ කකුළුවන් ඇල්ලීමට ගිය පුද්ගලයකු ව්‍යාඝ්‍රයකු විසින් කැලයට ඇදගෙන ගොස් ඇත්තේ ඔහුගේ දරුවන් බියපත්ව කෑ ගසද්දීය.

දැනට ලෝකයේ සිටින ව්‍යාඝ්‍රයන්, කොටි සහ දිවියන්ගේ ඝහනයෙන් අඩක් පමණ ඉන්දියාවේ වාසය කරති. බළල් පවුලේ විශාලතම සාමාජිකයන් වන මොවුන්ගේ සම, දත් සහ නිය වෙනුවෙන් මිනිසුන් උගුල් අටවා මොවුන් මරා දමන බැවින් සීඝ්‍රයෙන් වඳවී යාමේ තර්ජනයට මුහුණ දී ඇති සත්ත්ව කොට්ඨාශයක් ලෙස ද ඔවුන් හඳුන්වයි.