(අනුරාධපුර දයාරත්න ඇඹෝගම)

ජාතික හා ජාත්‍යන්තර මට්ටමේ ජයග්‍රහණ හිමිකරගත් උතුරු මැද පළාතේ ක්‍රීඩක ක්‍රීඩිකාවන් හට උපහාර ප්‍රදානය කිරීම පළාත් ආණ්ඩුකාර මහාචාර්ය තිස්ස විතාරණ මහතාගේ ප්‍රධානත්වයෙන් අද (28) අනුරාධපුර ග්‍රෑන්ඩ් ලෙෂර් හෝටලයේදී සිදු කෙරිණි.

මෙම වසරේ දකුණු ආසියානු ක්‍රීඩා උළෙල නියෝජනය කරමින් ජයග්‍රහණ හිමිකරගත් ක්‍රීඩක ක්‍රීඩිකාවන් 17ක් හා ජාතික මට්ටමේ ක්‍රීඩක ක්‍රීඩිකාවන්  145දෙනෙකු මෙහිදී උපහාර ලැබීය.

පසුගිය වසරේ පැවැති 44 වැනි ජාතික මහා ක්‍රීඩා උළෙලේ දී 06 වන ස්ථානය උතුරු මැද පළාතට හිමිවූ අතර එහිදී  රන් පදක්කම් 14ක්, රිදී පදක්කම් 25ක් සහ ලෝකඩ පදක්කම් 40ක් උතුරු මැද පළාත නියෝජනය කළ ක්‍රීඩක ක්‍රීඩිකාවෝ හිමිකර ගත්හ.

"ජාතික කෙළි බිමට රන් අරුණැල්ලක්" නමින් වර්ණ ප්‍රදාන උළෙල නම් කර තිබුණි.

මෙම අවස්ථාවට පළාත් ප්‍රධාන ලේකම් ඒච්.ඒම්.පී. බණ්ඩාර, ආණ්ඩුකාර ලේකම් ඒ.කේ.ඒන්. වික්‍රමසිංහ, ක්‍රීඩා අමාත්‍යාංශ ලේකම් ඒ.කේ.කේ.එම්.ආර්.ඩබ්. කුමාරගම, පළාත් ක්‍රීඩා අධ්‍යක්ෂ සුමිත් විමලසිංහ යන මහත්වරු සහභාගි වී සිටියහ.