ශිවා බණ්ඩාර
 
 
මේ දිනවල වයඹ, උතුරුමැද, උතුර ආදී  පළාත්වලට බලපා ඇති උෂ්ණාධික දේශගුණික තත්වය මත පාසල් දරුවන්ගේ  පාසල්  නිල ඇදුම ප්‍රදේශයේ දේශගුණික තත්වයට සරිලන පරිදි වෙනස් කිරීම කෙරෙහි රජයේ අවධානය යොමු විය යුතු බව ඇහැටුවැව ගල්ගමුව සෞඛ්‍ය වෛද්‍ය නිලධාරි වෛද්‍ය ආසිරි මුණසිංහ මහතා පවසයි.
 
මෙම ප්‍රදේශයේ වෛද්‍යවරු ඇතුළු අධ්‍යාපනික බලධාරීන් ද මේ පිළිබඳව අවධානය යොමු කරන බවද මුණසිංහ මහතා පැවසීය.
 
 
මේ දිනවල ගල්ගමුව ඇහැටුවැව ආදී වයඹ පලාතේ බොහෝ ප්‍රදේශවල උෂ්ණත්වය සෙල්සියස් අංශක 38 ඉක්මවන අවස්ථා මෙන්ම පොලොන්නරුව වැනි ප්‍රදේශවල උෂ්ණත්වය සෙල්සියස් අංශක 40ට ළඟා වන අවස්ථා ද පවතින බැවින් පාසල් දරුවන් නිල ඇදුම හේතුවෙන් මහත් පීඩාවට පත්වන බවද පැවසීය.
 
 
එමෙන්ම දිවයිනේ උතුරුමැද, වයඹ,උතුරු නැගෙනහිර ආදී ප්‍රදේශ වසරේ වැඩි කාලයක් 
දැඩි උෂ්ණාධික දේශගුණික තත්වයක් පවතින බැවින් මෙම නිල ඇඳුම පාසල් දරුවන්ට 
මානසික සහ ශාරීරික පීඩාවක් නොවන සැහැල්ලු ඇදුමක් බවට පත්විය යුතු බවද සියලු වෛද්‍යවරුන්ගේ මතය බව මුණසිංහ මහතා පවසයි. නුවරඑලිය, බදුල්ල ආදී ප්‍රදේශවල නිල ඇදුම  උතුරුමැදට වයඹට නුසුදුසු බවද පවසයි.
 
 
වයඹ පළාත ඇතුළු බොහෝ ප්‍රාථමික පාසල්වල මේ වන විට බෝ සහ ටයි පටියක් නිල ඇඳුමට එකතු වී ඇති අතර ශිෂ්‍ය නායක නායිකාවන් අත් දිග ගවුම් සහ කමිස වලින් සැරසී සිටිමද  මේ වන විට ඇතැම් පාසල්වල දක්නට ලැබෙන බවද පැවසීය.
 
 
ගැහැණු දරුවන් සඳහා ද කර කපන ලද සැහැල්ලු ගවුම් ඇතැම් පාසල්වල දක්නට ලැබෙන අතර පාසලේ අනන්‍යතාවය තහවුරු කර ගැනීම සඳහා බැජ් එකක් පැළදීම ප්‍රමාණවත් බවද පැවසේ.
 
 
මෙම දැඩි උෂ්ණත්වය සහිත දේශගුණය තුළ විදුලි පංකාවක් හෝ නොමැති ඇතැම් පාසල්වල දරුවන් දිවා කාලය වන විට මහත් මානසික අවපීඩනයකට පත් වන අතර ඉතා ඉක්මණින් කෝපයට පත්වීම, දරදඩු වීම, අධ්‍යාපනය කෙරෙහි හිත යොමු නොවිම ආදි කරුණු සඳහා ද හෝමෝන ක්‍රියාකාරිත්වය ආරම්භ වන මෙම සමයේ අධික ලෙස දහදිය දැමිමෙන් දුර්ගන්ධයක් වහනය විය හැකි බවද වෛද්‍යවරු පෙන්වා දෙති.