(කාංචන කුමාර ආරියදාස)

රාජ්‍ය පරිපාලන හා ස්වදේශ කටයුතු පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන් මහතාගේ පෞද්ගලික ලේකම්වරයකු ලෙස පෙනී සිටිමින් කිහිපවිටක දීම මුදල් ගත් බව කියන පුද්ගලයකු අත්අඩංගුවට ගත් බව දඹුල්ල පොලිසිය පවසයි.

අත්අඩංගුවට ගත් සැකකරු රුපියල් 180,000 ක මුදලක් ලබා ගත්තැයි පොලිසිය සඳහන් කරයි.

මාතලේ මඩවල ප්‍රදේශයේ පදිංචිකරුවකු මෙලෙස අත්අඩංගුවට ගෙන ඇති අතර අමාත්‍යවරයා විසින් දඹුල්ල පොලිසියට කළ දැනුම් දීමකින් පසු සැකකරු අත්අඩංගුවට ගෙන තිබේ.

මාතලේ මඩවල ප්‍රාදේශීය සභා නියෝජිතයකු සැකකරු පිළිබඳව අමාත්‍යවරයාට  දැනුම් දී තිබේ. ඒ අනුව මුදල් ලබාදුන් පුද්ගලයා පිළිබඳවත් කරුණු සොයා බලා වහාම එම පුද්ගලයා අමාත්‍යවරයා විසින් සිය කාර්‍යාලයට ගෙන්වා  ප්‍රශ්න කර තිබේ.

එහිදී හෙළි වී ඇත්තේ අවස්ථා කිහිපයක දී තමන්ගෙන් රුපියල් 180,000 ක් රක්ෂණ වාරික ලෙස ලබාගෙන එම මුදල් ඉල්ලා සිටින අවස්ථාවන් හිදී තමන්ට තර්ජනය කරන බවයි.

අමාත්‍ය ජනක බණ්ඩාර තෙන්නකෝන් මහතාගේ පෞද්ගලික ලේකම්වරයකු බව පවසමින් මෙම පුද්ගලයා තමාට තර්ජනය කළ බව ද  මුදල් ලබාදුන් පුද්ගලයා අමාත්‍යවරයා හමුවේ සඳහන් කර තිබේ.

ඒ අනුව අමාත්‍ය ජනක බණ්ඩාර තෙන්නකෝන් මහතා මේ බව තම නියෝජිතයාට දැනුම්දී වහාම මෙම  ව්‍යාජ ලේකම්  රැගෙන එන ලෙස දැනුම් දීමත් සමග විනාඩි කිහිපයක් ඇතුළත මෙම පුද්ගලයා අමාත්‍ය ජනක බණ්ඩාර තෙන්නකෝන් මහතාගේ දඹුල්ල යාපාගම පිහිටි නිවසට ගෙන්වාගෙන තිබේ.

මඩවල ප්‍රදේශයේ පදිංචි මොහු පෞද්ගලික රක්ෂණ සමාගමක නියෝජිතයකු ලෙස සේවය කරන අයෙකු බවත් රක්ෂණ වාරික ලෙස ප්‍රදේශයේ බොහෝ ජනතාවගෙන් මුදල් ලබාගෙන ඒවා රක්ෂණ වාරික වලට නොගෙවා තම පෞද්ගලිකව පරිහරණය කිරීමේ චෝදනා රැසක් මොහුට විරුද්ධව පවතින බවත් මුදල් පිළිබඳ කරුණු විමසීමේ දී ඔහු විවිධ දේශපාලනඥයන්ගේ නම භාවිතා කරමින් තනතුරු භාවිතා කරමින් ජනතාව බිය ගන්වමින්  සිටින බවට පරීක්ෂණවලදී අනාවරණය කර ගැනීමට හැකිවී තිබේ.

මෙසේ අත්අඩංගුවට ගත් පුද්ගලයා අද (10) දඹුල්ල මහේස්ත්‍රාත් අධිකරණයට ඉදිරිපත් කිරීමට නියමිතය.