(චන්ද්‍රසේන ගමගේ)

කතරගම දෙටුගම දී ආබාධිත විශ්‍රාමික හමුදා සෙබලෙකුට මිරිස් කුඩු ගසා තියුණු ආයුධයකින් පහර දී ඝාතනය කිරීමේ සිද්ධියට සම්බන්ධ සැකකරුවන් තිදෙනෙකු අද (02) සවස අත් අඩංගුවට ගත් බව පොලිසිය පවසයි.

ඉකුත් අගොස්තු මස 16 දින රාත්‍රීයේදී  ආබාධිත විශ්‍රාමික හමුදා සෙබලාගේ නිවසේදී මෙම සිදුවීම සිදුවී ඇති බව පොලිසිය කියයි.

විශ්‍රාමික හමුදා සෙබලාගේ ඝාතනය සම්බන්ධයෙන් විමර්ශනයක් සිදු කළ තංගල්ල කොට්ඨාස අපරාධ විමර්ශන අංශයේ නිලධාරීන් විසින් මෙම සැකකරුවන් තිදෙනා අත්අඩංගුවට ගෙන ඇත්තේ කතරගම ප්‍රදේශයේදීය.

පොලිස් අත්අඩංගුවට පත් වූවන් වයස අවරුදු 23ත් 30ත් අතර පසු වන අය  බවත් පවුල් ආරවුලක් මත මෙම ඝාතනය සිදු කර ඇති බවත් පොලිසිය පවසයි.

අත්අඩංගුවට පත් සැකකරුවන් අතර හමුදා වෙන් පලාගිය සෙබලෙකුද සිටින බවත් අත් අඩංගුවට පත් සැකකරුවන් කතරගම හා හම්බෙගමුව ප්‍රදේශවල පදංචිකරුවන් බවත් පොලිසිය කීය.

සැකකරුවන් හෙට (03) තිස්සමහාරාම මහේස්ත්‍රාත් අධිකරණයට ඉදිරිපත් කිරීමට නියමිතය.