(එම්. සුසිල් ප්‍රියන්ත)
                   
අම්බලන්ගොඩ ධර්මාශෝක විද්‍යාලයේ පළමු වසරට සිය දරුවන් ඇතුළත් නොකරගත් බව පවසමින් අද(16) අම්බලන්ගොඩ බස් නැවතුම්පොළ ඉදිරිපිටදී මව්පියවරු විරෝධතාවක් පැවැත්වූහ.
                    
මෙතෙක් කලක් ධර්මාශෝක විදුහලේ එක වසරට ළමුන් ඇතුළත් කිරීමට දුර විමසා බැලුවේ එම විදුහල් ප්‍රාථමික  අංශයේ සිට බවත් එහෙත් මෙවර ද්වීතික අංශයේ සිට දුර බැලූ බවත් පිරිස කීහ.
                         
මේ නිසා  ධර්මාශෝක විදුහලේ එක වසරට සිය දරුවන් ඇතුළත් කරගැනීමට නොහැකි වූ බවද පාසල ආසන්නයේ අති  හිරේවත්ත, පින්නදූව ආදී ප්‍රදේශවල ළමයින්ට මෙවර ධර්මාශෝක විදුහල අහිමිවී ගොස් ඇති බවද ඔවුහු පැවසූහ. නීතිය හමුවටද යන බවද ඔවුහු කීහ.
 
මේ සම්බන්ධයෙන් අම්බලන්ගොඩ ධර්මාශෝක විදුහල්පති හසිත කේශර වෙත්තමුනි මහතාගෙන් විමසූවිට මෙසේ කීවේය.
                       
“නගරයේ තවත් පාසල් තියෙද්දිත් ධර්මාශෝක විදුහලටම දෙමාපියන් තමන්ගේ ළමයි ඇතුළත් කිරීමට උත්සහා ගැනීම ගැන ලොකු සතුටක්. මම ආපූ දවසේ ඉදලා නියමිත දිනයට එක වසරට ළමයි බඳවා ගත්තා. මෙවරත් නීතියේ මට දී තිබූ අවසරය අනුවයි එක වසරට ළමයි ඇතුළත් කිරීමට සම්මුඛ පරීක්ෂණ පැවැත්වුවේ. යමෙකුට අසාධාරණයක් කරන්න මට කිසිම අවශ්‍යතාවක් නැහැ” යැයිද කීය.