(දයාරත්න ඇඹෝගම)
 
තම සැමියා සමඟ අනියම් සබඳතාවයක් පවත්වන බවට චෝදනා කරමින් අසල්වැසි විවාහක කාන්තාවකගේ මුහුණට මිරිස් කුඩු ගසා පහර දී ඇයගේ වරලස ද කපා රුපියල් ලක්ෂයකට අධික වටිනා රන් මාලය ද සොරා ගත් බව කියන අක්කා නගෝ දෙදෙනෙකුට විරුද්ධව පුළුල් පරික්ෂණයක් ආරම්භ කර ඇතැයි ඉපලෝගම පොලිසිය කියයි.

මෙම සිද්ධියට ලක්වූ කාන්තාව සහ චෝදනාවට ලක්ව ඇති අක්කා නගෝ දෙදෙනා  විජිතපුර,පලුගස්වැව ගොවිපල ආසන්නයේ පදිංචි අසල්වාසින් බව පොලිසිය පවසයි.

පැමිණිලිකාරිය පසුගියදා සිය දියණිය පාසලට හැරලා මෙම අක්කා නගෝ පදිංචි නිවස ඉදිරියෙන් යමින් සිටියදී ඇය සිය නිවසට කැදවා ගෙන විත් මෙම පහරදීම සිදුකර ඇතැයි ඇය විසින් පොලිසියට සිදුකළ පැමිණිල්ලේ සඳහන් වේ.

තම සැමියා සමග පවත්වන හාදකම නවතන ලෙස පවසමින් මෙම අක්කා තමන්ට පහර දුන් බවත් පසුව අක්කා නගෝ දෙදෙනා සමඟ එක්ව තමන්ගේ වරලස කපා දමා මුහුණට මිරිස් කුඩු ගසා හොද හැටි පහර දුන් බවද මෙම පැමිණිලිකාරිය කියා සිටී.

මෙම පැමිණිල්ල අනුව අක්කා නගෝ දෙදෙනා අත්අඩංගුවට ගෙන අධිකරණයට ඉදිරිපත් කිරිමට නියමිතය.
සිද්ධිය සම්බන්ධයෙන් ඉපලෝගම පොලිසිය වැඩිදුර පරික්ෂණ සිදුකරයි.