(මනෝජ් හර්ෂික)
 
නිදහසින් පසුව මෙරට රාජ්‍ය නායකයින් සිදු කළ සේවයට වඩා විශිෂ්ට සේවාවක් රටේ ජනතාව වෙනුවෙන් ඉටු කිරීමට තමන් සුදානම් බව නිවාස, ඉදිකිරීම් හා සංස්කෘතික කටයුතු අමාත්‍ය සජිත් ප්‍රේමදාස මහතා අද(22) පැවසීය.
 
ජනදුක හඳුනාගෙන ඔවුන්ගේ ගැටලුවලට ස්ථිර විසඳුම් ලබා දෙන රාජ්‍ය නායකත්වයක් ඉදිරියේදී රටට අවශ්‍ය නම් ඒ වෙනුවෙන් තමන්ට ශක්තිය ලබා දෙන ලෙස ජනතාවගෙන් ඉල්ලා සිටින බව අමාත්‍යවරයා මෙහිදී කීය.
 
රාජ්‍ය බලයේ සිටියදී පසුගිය පාලකයින් කෝටි ගණනින් ජනතාමුදල් වැයකර වෙඩි නොවදින නිලරථ ගෙන්වා ගත් බවත්, ඔවුන්ට ජනතාවගේ ජීවිත වලට වඩා තමන්ගේ ජීවිත වැදගත් වූ බව කී අමාත්‍යවරයා,තමන්ට වැදගත් වන්නේ පොදු ජනතාවගේත්,රටේ දරු පරපුරේත් ජිවිත බවද එහිදී වැඩිදුරටත් ප්‍රකාශ කළේය.
 
 “සැමට සහන” වැඩසටහන යටතේ හම්බන්තොට දිස්ත්‍රික්කයේ,වලස්මුල්ල, බටගස්ස, කිරම ඔය හරහා ඉදිකළ “මහරජ වලගම්බා” පාලම ජනතා අයිතියට පත් කිරීමේ අවස්ථාවට එක්වෙමින් අමාත්‍යවරයා මේ බව සඳහන් කළේය.