(අශන්ති වරුණසුරිය)

තමන් දකින එකම නායකයා සජිත් ප්‍රේමදාස මහතා බවත් මාලිමාව බිල්ලෙක් මවා පැමිණ සිටින බවත් හිටපු පාර්ලිමේන්තු මන්ත්‍රී සුජීව සේනසිංහ මහතා පැවසුවේය. තමන්ගේ දේශපාලන ගමන ජනතාව දෙන තීන්දුවට අනුව තීරණය කරන බවද පැවසූ ඔහු තමන්ගේ ඉදිරි දේශපාලන ගමන ගැනද මෙසේ අදහස් දැක්විය. 

දේශපාලනය එපා වෙලා ගිය ඔබට නැවත දේශපාලනය ඕන වුණේ ඇයි ?
ඕන වුණේ නැහැ. මම එදා පොරොන්දුවක් දුන්නා පරාජය වුණොත් ඉවත් වෙලා යනවා කියලා. මගේ වචනෙට ගරු කරලා මම ගියා. දේශපාලනයයට නැවත පැමිණියේ ජනතාවගේ වුවමනාව මත. 

මම ඉල්ලුම් පත්‍රයක්වත් දාලා නෙමෙයි දේශපාලනයට අවතීර්ණ වුණෙත්. 2004දී පළමු වරට මගේ නම දාලා තිබ්බේ බලෙන්. ඊට පස්සේ බැදුම්කර ප්‍රශ්නයක් අල්ලගෙන් මට මාධ්‍ය වලින් ගැහුවා. ඉතිං ජනතාව මාව ගෙදර ඇරියා.

අද නැවත රාජපක්ෂ කෙනෙක් බිහි වෙන්න යනවා. කබලෙන් ලිපට වැටෙන්න බැහැ. මේ මැතිවරණයට පමණයි මම සම්බන්ඳ වෙලා ඉන්නේ. ජනතාවගේ ඉල්ලීම අනුවයි මම මෙලෙස නැවත දැනුවත් කිරීමට පැමිණියේ. ජනතාව ඉන්න කිවුවොත් ඉන්නවා නැත්නම් යනවා.

නිහඬව සිටි කාලයේදී කලකිරීමක් ඇති වුණාද ?
නැහැ. අපි වගේ තරුණ මන්ත්‍රීවරුන්ට අවස්ථාව ලැබුණේ නැහැ. එවැනි දේවල් වලට කලකිරීමක් තිබ්බා.

ඒ කියන්නේ පක්‍ෂය ඇතුලෙන්මයි කැපිල්ලක් තිබ්බේ ?
අපි උඩට නගිනකොට පොඩි ළමයි වගේ එයාලා හැසිරුණේ. 

ඔබ දකින නායකයා කවුද ?
සජිත් ප්‍රේමදාස. වයස 55යි. ඔහු සීමිත කාලය තුල ඔහු ගෙවල් හදපු හැටි මම දැක්කා  

නමුත් ඔහුගේ පෞරුෂය විවේචනයට ලක් වෙනවා ?
පෞරුෂයට වඩා සන්නිවේදනය අඩු බවක් තියෙන්නේ. මිනිස්සු බලාපොරොත්තු වෙන්නේ හොඳින් කතා කිරීම. කතා කරන්න පුළුවන් මිනිස්සු වැඩ කාරයෝ නෙමෙයි. සජිත් බොරු කරන්නේ නැහැ. හොඳ නුවණක් තියෙනවා. බොරුවට ළමයි වඩා ගන්නේ නැහැ. 

පසුගිය දා අරගලය දියත් වුණා. 225ම එපා කිවුවා. ඔබලා ප්‍රතික්ෂේප වෙලා නේද ?
නැහැ. හදන්න පුළුවන්. දැන් පරාද වුණා කියලා ක්‍රිකට් ටීම් එකම ඉවත් කරලා හරි යනවා ද ? අත්දැකීම් ඇති මිනිස්සු තෝරාගෙන ඒ මිනිස්සුන්ගෙන් මේක හදන්න ඕන. වියත් මඟ ගෙනාවා කියලා මේක කරන්න පුළුවන් වුණාද ? එළියේ ඉදන් කියන්න පුළුවන්. අත්දැකීම් නැතුව කරන්න බැහැ. 225ම එපා කියලා දැන් ඒ පිරිස ඇතුලේ ඉන්නවා. උනුත් එකයි මුනුත් එකයි ගොඩට අපිව දාන්න එපා.

පුංචි ජන්දේ දිනන සටන කොතනද ?
මම හිතන්නේ මම එන්න ටිකක් පරක්කුයි. නමුත් දිනන වැඩ පිළිවෙළ කරගෙන යනවා. 

ගමට යන්න පුළුවන් ද ?
අපිට යන්න පුළුවන්. ආදරෙන් කතා කරනවා. අපිට යන්න පුළුවන් පොහොට්ටුවට නම් යන්නම බැහැ.

බිම් මට්ටමේ ජනතාවගේ රැල්ල ජවිපෙ වෙලා නේද ?
ජවිපෙ බිල්ලෙක් මවාගෙන එනවා. අපි ප්‍රතිපත්ති කවදාවත් මාරු කරලා නැහැ. ජවිපෙ පුද්ගලික විශ්ව විද්‍යාල වගේ තව බොහෝ කරුණු සම්බන්දයෙන් ඒවා හොඳයි, එහෙමත් නැහැ වගේ දෙබිඩි පිළිවෙතක ඉන්නේ. උත්තර දෙන්නේ නැතුව ගොඩක් දේවල් මඟ අරිනවා. හරියට රට දියුණු කරන විදිය සහ එයාලගේ ප්‍රතිපත්ති දෙන්න කියන්නකෝ. අනුර කුමාර  මේක කරන්නේ කැට දාලද ? කොහොම වුණත් මිනිස්සුන්ට එපා වෙලා ඉන්නේ. ඒ නිසා කොහාට හරි යන්න හොයනවා.

ඉතින් ඒ සෙවිල්ලෙන් මාලිමාවට සොයා ගනියි කියලා හිතෙන්නේ නැත්ද ?
ඒක පොඩ්ඩක් එහෙම නැඹුරු වෙන නිසා තමයි. ඒ නිසයි මම ආවේ. රෑ වැටුණ වලේ දවල් වැටෙන්න දෙන්න බැහැ. තව වැටුණොත් අපිට යන්න තැනකුත් නැහැ. රනිල් වික්‍රමසිංහට අත්දැකීම් තියෙන නිසා මේක කොහොම හරි අඹරවාගෙන ඉන්නවා. 

ඔබලාගේ රට කරවන වැඩ පිළිවෙල මොකද්ද ?
අපි පෙන්නපු ඒවා කරලා තියෙනවා. හැම ශේෂ්ත්‍රයකටම වැඩ පිළිවෙලක් තියෙනවා. අපි සේරම කරගෙන එනකොට සහරාන්ලගේ ප්‍රහාරය එල්ල වුණා. අපි එන්නේ කෑදරකමින් හම්බ කරන්න නෙමෙයි 

පොහොට්ටුවේ රැල්ලක් නැවත එයි කියලා හිතෙන්නේ නැත්ද ?
තව අවුරුදු 10කින් විතර එයි. ඊට කළින් හොරු අල්ලලා දඬුවම් දෙන්න ඕන. ඉතිං මේ රට හදන්න ජනතාව අවස්ථාවක් දෙයි කියලා හිතනවා. 

ඔබේ දේශපාලන ගමන මෙතැනින් කොතැනට ද ?
ජනතාවට බාරයි.  ජනතාව හිතනවා නම් මම ඉන්නම ඕන නායකයෙක් කියලා මම මගේ සතුට පැත්තකින් තියලා ලෝකේ අමාරුම රස්සාව දේශපාලනය කරනවා.