(බිඟුන් මේනක ගමගේ) 

ආර්ථිකය ගොඩනැංවීමට ගෝඨාභය රාජපක්ෂ මහතා යෝජනා කරන්නේ දශක අටකට වඩා පැරණි හණමිටි ප්‍රතිපත්තියක් යැයි මුදල් රාජ්‍ය ඇමැති ඉරාන් වික්‍රමරත්න මහතා අද (22) පැවැසීය.

ගෝඨාභය රාජපක්ෂ මහතා ආර්ථිකය ගොඩනැගීමට යෝජනා කරන්නේ රාජ්‍ය අංශයට මුල්තැන් දීම යැයි ද එය යල්පැන ගිය උපක්‍රමයක් යැයි වික්‍රමරත්න මහතා කීය.

අතීතයේදී ලංකාවට පසුපසින් සිටි වියට්නාමය, කොරියාව වැනි රාජ්‍ය ලංකාව පසුකර ගියේ රාජ්‍ය අංශය මගින් ආර්ථිකය නැංවීමේ ප්‍රතිපත්තියක ලංකාව සිර වී සිටි නිසා යැයි මුදල් රාජ්‍ය ඇමැතිවරයා චෝදනා කළේය.

ජාතික ආරක්ෂාව හා ආහාර ආරක්ෂාව රජය යටතේ තබා ගනිමින් පෞද්ගලික අංශය ශක්තිමත් කිරීමෙන් ආර්ථිකය නගාසිටුවීමට කටයුතු කිරීම එක්සත් ජාතික පෙරමුණේ ප්‍රතිපත්තිය යැයි ද ඉරාන් වික්‍රමරත්න මහතා අවධාරණය කර කීය.

ජනාධිපතිවරණය ඉලක්ක කරගනිමින් එක්සත් ජාතික පෙරමුණ ජාතික මට්ටමින් කළ ජනමත සමීක්ෂණවලදී මේ කාරණා ගැන ජනතාව දැක් වූ අදහස් වලින් ද සිය පක්ෂ ප්‍රතිපත්ති නිවැරදි බව තහවුරු වී යැයි ද ඇමැතිවරයා සඳහන් කළේය.

පරිගණක හා ස්මාට් දුරකතන ඇසුරෙහි උපන් නව පරම්පරාවේ චින්තනය ගැන වර්තමානයේ රට පාලනය කරන කණ්ඩායම්වලට ලොකු අවබෝධයක් නැතැයි කී හෙතෙම ඔවුන් ඉදිරි ජාතික මැතිවරණ වලදී රටේ පාලනයත් පක්ෂවල නායකත්වයත් නව පරපුරට බාර කරනු ඇතැයි ද කීය.

මෙම පරිවර්තනය මඟහැරයාමට කිසිදු දේශපාලන පක්ෂයකට නොහැකි වනු ඇතැයි ද ඊට ගැලපෙන ලෙස පක්ෂ අභ්‍යන්තර ප්‍රජාතන්ත්‍රීකරණයට සියලුම දේශපාලන පක්ෂවලට සිදුවනු ඇතැයි ද වික්‍රමරත්න මහතා වැඩිදුරටත් සඳහන් කළේය.