(ඩයනා උදයංගනී)
         
එක්සත් ජාතික පක්‍ෂයේ ජනාධිපතිවරණ අපේක්‍ෂකයා කවුරුන් වුවත් ශ්‍රී ලංකා නිදහස් පක්‍ෂය ඔහුට සහය දෙන්නේ නැතැයි එහි ජ්‍යෙෂ්ඨ උප සභාපති, පාර්ලිමේන්තු මන්ත‍්‍රී නිමල් සිරිපාල ද සිල්වා මහතා පැවසීය.
         
ඒ සදහා රනිල් වික‍්‍රමසිංහ, කරු ජයසූරිය හෝ සජිත් ප්‍රේමදාස යන කවරෙක් ඉදිරිපත් වුවත් සහය දීමේ හැකියාව ශ්‍රී.ල.නි.පයට නොමැති බව කී නිමල් සිරිපාල ද සිල්වා මහතා එහිදී ගත යුත්තේ පාක්‍ෂිකයින් කැමති තීන්දුවක් බව ද  සදහන් කළේය.
 
එළඹෙන ජනාධිපතිවරණයේදී පොදු සතුරා පරාජය කිරීමට නම් ශ්‍රී ලංකා නිදහස් පක්‍ෂය හා ශ්‍රී ලංකා පොදුජන පෙරමුණ අතර සාකච්ඡාවලදී දෙපාර්ශවයම නම්‍යශීලීව කටයුතු කරමින් ඒකරාශී විය යුතු බව ද නිමල් සිරිපාල ද සිල්වා මහතා කීවේය.
 
දෙපාර්ශවය අතර සාකච්ඡාවල අවසන් ප‍්‍රතිඵලය රටේ ජනතාවට සතුටුදායක එකක් බවට පත්කරගැනීමේ වගකීම දෙපාර්ශවයටම තිබෙන බව ද හෙතෙම සදහන්  කළේය .
 
ශ්‍රී ලංකා නිදහස් පක්‍ෂයට රජවීමේ හැකියාව නොමැති වුවත් එය නොමැතිව රජුන් තැනීමේ ශක්තියක් වෙනත් කිසිම පක්‍ෂයකට නැතැයි ද ජ්‍යෙෂ්ඨ උප සභාපතිවරයා ප‍්‍රකාශ කළේය.

නිමල් සිරිපාල ද සිල්වා මහතා මේ බව පැවසුවේ කොළඹ, ඩාර්ලි පාරේ පිහිටි ශ්‍රී ලංකා නිදහස් පක්‍ෂ මූලස්ථානයේදී අද(2) පැවති මාධ්‍ය හමුවක් අමතමිනි.
 
එක්සත්  ජනතා නිදහස් සන්ධානයේ මහලේකම්, පාර්ලිමේන්තු මන්ත‍්‍රී මහින්ද අමරවීර මහතා මෙහිදී පැවසුවේ පොදුජන පෙරමුණ හා පවත්වන සාකච්ඡාවලදී ශ්‍රී.ල.නි.ප අනන්‍යතාවය ආරක්‍ෂා වන ආකාරයේ තීන්දුවකට එළඹීමට නොහැකි වුවහොත් වෙනම ජනාධිපතිවරණයට තරග කිරීමට සිදුවන බවයි.

ශ්‍රී.ල.නි.පයේ අරමුණ ජනාධිපතිවරණයේදී පුද්ගලයකු නොව වැඩපිළිවෙලක් ජයග‍්‍රහණය කරවීම බව කී අමරවීර මහතා පොදුජන පෙරමුණ සමග පැවැත්වෙන සාකච්ඡාසාර්ථක කරගැනීම සදහා තම පක්‍ෂය සැමවිටම සුබවාදීව ක‍්‍රියා කර තිබෙන බව ද කීවේය.
 
ඇල්පිටිය ප‍්‍රාදේශීය සභා මැතිවරණය සදහාද එක්සත් ජනතා නිදහස් සන්ධානය ලෙස වෙනම තරග කිරීමට බලාපොරොත්තු වන බව හෙතෙම සදහන් කළේය.