(සිටිනාමළුව - අනීෂා මානගේ, රන්න - චන්ද්‍රසේන ගමගේ සහ තංගල්ල - ආරියදාස කොඩිතුවක්කු)

“මේ ආණ්ඩුව වරාය, ගුවන්තොටුපොළ විකුණනවාට එරෙහිවන්න ජනතාවට අයිතියක් තියෙනවා. ජේ.ආර්.ගේ, ප්‍රේමදාසගේ කාලෙයේදීවත් විරෝධතා කළාට මන්ත්‍රීවරු අත්අඩංගුවට ගත්තේ නැහැ. අනාගත පරපුර සතු මේ සම්පත්වලට අත තියන්න එපා කියන පණිවිඩය මේ ආණ්ඩුවට දෙනවා” යැයි හිටපු ජනාධිපති මහින්ද රාජපක්ෂ මහතා පැවැසීය.

මහින්ද රාජපක්ෂ මහතා මේ බව පැවැසුවේ ඊයේ (15) තංගල්ල බන්ධනාගාරය අසලදී මාධ්‍ය අමතමිනි.

හිටපු ජනාධිපති මහින්ද රාජපක්ෂ මහතා සමඟ හිටපු ජනාධිපති ආර්යා ශිරන්ති රාජපක්ෂ මහත්මියත් ඔවුන්ගේ පුත් යෝෂිත රාජපක්ෂ මහතාත් පැමිණියහ. ඔවුන් මෙලෙස තංගල්ල බන්ධනාගාරයට පැමිණියේ පසුගියදා හම්බන්තොටදී පැවැති විරෝධතාවයෙන් අනතුරුව පොලිස් අත්අඩංගුවට පත්ව රිමාන්ඞ් භාරයට පත් වූ මන්ත්‍රීවරුන් ඇතුර්‍ළු පිරිසගේ සුවදුක් විමසීමටය.

මාධ්‍ය වෙත අදහස් දක්වමින් මහින්ද රාජපක්ෂ මහතා මෙසේ ද පැවැසීය.

“තරුණ මන්ත්‍රීවරු හා වයසක අම්මලා හා පොඩි දරු පැටව් රිමාන්ඞ් කරලා තියෙනවා. සම්පත් විකුණනවාට විරුද්ධව පෙළපාළි ගිහිල්ලා. විරෝධය පාලා. මොනව ද මේ විකුණන්න හදන්නේ? වරාය, ගුවන්තොටුපොළ. මහජනයාට අයිතියක් තියෙනවා මේවාට විරුද්ධව නැගී හිටින්න. ජේ.ආර්.ගේ කාලේ ප්‍රේමදාසගේ කාලේ වගේ කාලවල්වලදී මන්ත්‍රීවරු විරෝධතා පැවැත්වූවා කියලා අත්අඩංගුවට ගත්තේ නැහැ. තමන්ගේ රටේ සම්පත් ටික විකුණනවාට විරුද්ධ වෙන එකට රටේ හැම පුරවැසියකුටම අයිතියක් තියෙනවා. ඒ අය අද රිමාන්ඞ් වෙලා තියෙනවා.

හෙට නඩුව තියෙනවා. මම හිතනවා සාධාරණයක් වෙයි කියලා. ගුවන්තොටුපොළ කිව්වම මුළු ස්පේස් එකම පාලනය කරන්නේ ගුවන්තොටුපොළෙන් අවසානයේදී. ඒක ලොකු ගැටලුවක් වෙනවා අනාගතයේදී. වරාය හදලා චීනයට දුන්නම සමහරු කියනවා චීනෙ උඩින් යන්න බැහැ කියල. ඒක බොරුවක්. ගුවන්තොටුපොළේ අවසරයකින් තොරව එහාට මෙහාට යන්න බැහැ. පොළව විතරක් නෙවෙයි, අහසත් දීලා මේ ආණ්ඩුව.

උතුරේ අයට නීතියක් නැහැනේ. උතුරේ නීතිය උතුරට ඕන විදියට. මෙයාලා ඡන්ද ගන්න බලාගෙන ඕනම දෙයක් කරන්න එයාලට නිදහස දීලා තියෙනවා. මෙහෙට තමයි නිදහස නැත්තේ. මේවා සහගහන අපරාධ. මුස්ලිම් ළමයි හය දෙනෙක් ඉන්නවා. එක ළමයෙක් ඉන්නවා අවුරුදු දාහතයි. ඉස්කෝලේ යන ළමයි තුන් දෙනෙක් ඉන්නවා. අම්ම කෙනෙක් ළමයෙකුට කෑම අරගෙන එනකොට අත්අඩංගුවට අරගෙන. මේ වගේ ඒවයි සිදුවෙලා තියෙන්නේ. සමහරු වැඩට ගිහිල්ලා ගමේ යන්න යනකොට අත්අඩංගුවට අරගෙන. මේකයි තියෙන ප්‍රශ්නය.”