(අංජුල මහික වීරරත්න)

ගෘහාශ්‍රිත විදේශ රැකියා සඳහා අවශ්‍ය NVQ සහතික ව්‍යාජ ලෙස නිර්මාණය කළ මාවනැල්ලේ පුහුණු ආයතනයක් තාවකාලිකව තහනම් කිරීමට ශ්‍රි ලංකා විදේශ සේවා නියුක්ති කාර්යාංශය පියවර ගෙන ඇත.

කාර්යාංශය විසින් විදේශ රැකියා පුහුණුව බාහිර ආයතන මගින් සිදුකර ගැනීම සඳහා සුදුසු පුහුණු ආයතන වෙත අනුමැතිය ලබාදෙන අතර ඒ සඳහා තෘතීක අධ්‍යාපන කොමිෂන් සභාවේ (TVC) අනුමැතිය ලබාගත යුතුවිය. 

මහනුවර ප්‍රදේශයේ  මෙම ආයතනය මගින් ගෘහස්ථ ගෘහපාලන සහායිකා තනතුර සඳහා අවශ්‍ය පුහුණු පාඨමාලා මෙහෙයවන බවට සහතික වී තිබේ. එහෙත් ඔවුන් අදාළ කොන්දේසි කඩකරමින් ව්‍යාජ සහතික සකසා පුද්ගලයින්ට අලෙවිකර තිබෙන බව විදේශ සේවා නියුක්ති කාර්යාංශය කියයි.  

එමෙන්ම මෙම ආයතනය මෙම වසරේ පෙබරවාරි 05 දින සිට ඔවුන් මාවනැල්ල ප්‍රදේශයේද පුහුණු පාඨමාලාවන් ආරම්භ කර ඇති නමුත් මාවනැල්ල ශාඛාවට තෘතීක අධ්‍යාපන කොමිෂන් සභාවේ (TVC) අනුමැතිය ලබා ගෙන නොමැත. ගෘහස්ථ ගෘහපාලන සහායිකා තනතුර සඳහා අවශ්‍ය NVQ සහතික ව්‍යාජ ලෙස නිර්මාණය කර පුහුණු ලාභීන් සඳහා ලබාදෙන බවට තොරතුරු අනාවරණය වූ බව කාර්යාංශය කියයි.