හිටපු ජනපතීන්ගේ භුක්ති වින්ද සැප ලැයිස්තුව මෙන්න

(සුජිත් හේවාජුලිගේ)

චන්ද්‍රිකා බණ්ඩාරනායක කුමාරතුංග මහින්ද රාජපක්ෂ මෛත්‍රිපාල සිරිසේන ගෝඨාභය රාජපක්ෂ සහ රනිල් වික්‍රමසිංහය යන හිටපු ජනාධිපතිවරුන් සහ හිටපු ජනාධිපති රණසිංහ ප්‍රේමදාස මහතාගේ බිරිඳ හේමා ප්‍රේමදාස මහත්මිය වෙනුවෙන් විශ්‍රාම වැටුප් ඇතුළු අනෙකුත් පහසුකම් ලබාදීමට  පසුගිය වසර නවයක කාලයේදී ( 2017 සිට 2025 දක්වා). රුපියල් කෝටි හතළිස් නවයකට වැඩි මුදලක් වැය කර ඇතැයි  රජයේ ආරංචි මාර්ග සඳහන් කළේය.

විශ්‍රාම වැටුප් වෙනත් පුනරාවර්තන වියදම් ගොඩනැගිලි හා ඉදිකිරීම් වාහන වෙනුවෙන් මෙම මුදල වැය කර ඇත.

දෙවැනි විධායක ජනාධිපති රණසිංහ ප්‍රේමදාස මහතාගේ බිරිඳ හේමා ප්‍රේමදාස මහත්මිය විශ්‍රාම වැටුප වශයෙන් රුපියල් 65000ක්ද  ලේකම් දීමනාව ලෙස රුපියල් 23000ක්ද ලබාගෙන ඇත( හිටපු ජනපතිවරුන්ගේ හිමිකම් ඉවත් කිරීමේ පනත් කෙටුම්පත සම්මත වීමෙන් පසු ලේකම් දීමනාව අහිමිවී ගියේය)

ඇයට ලබාදී තිබූ වාහන සංඛ්‍යාව දෙකකි.KW 1218 සහ  KY 5787  එම වාහන වෙයි

සිවුවැනි  විධායක ජනාධිපති චන්ද්‍රිකා බණ්ඩාරනායක කුමාරතුංග මහත්මිය වෙනුවෙන් අංක කොළඹ 7  නිදහස් මාවතෙන් නිල නිවසක් ලබා දී ඇති අතර ඇයට ලබා දී ඇති විශ්‍රාම  වැටුපරුපියල්  97500කි.

ඇයගේ ලේකම් වෙනුවෙන් ලබාදී තිබූ දීමනාව රුපියල් ලක්ෂයකි.

ඇයට ලබා දී තිබූ නිල වාහන සංඛ්‍යාව දෙකක් වන අතර  KV 6807 සහ  KW 0461 එම වාහන දෙක වේ. එම නිල නිවසේ අලුත් වැඩියා කටයුතු වෙනුවෙන් මේ වසරේදී රුපියල් 33105.00 ක් වැය කර ඇත.

පස්  වැනි  විධායක ජනාධිපති මහින්ද රාජපක්ෂ මහතා වෙනුවෙන්  කොළඹ 7  විජේරාම මාවතෙන් නිල නිවසක් ලබා දී තිබූ අතර  ඔහුට හිමි විශ්‍රාම වැටුප රුපියල් 97500කි. ඔහුගේ ලේකම්වරයාගේ දීමනාව වශයෙන් රුපියල් පනස්දාහක් ලබා දී තිබිණ. නිල රථ වශයෙන් A 295414 සහ CAX 0559  යන වාහන දෙක ලබාදී තිබිණ.

හයවැනි විධායක ජනාධිපති මෛත්‍රිපාල සිරිසේන මහතා වෙනුවෙන් කොළඹ 7 හෙක්ටර්  කොබ්බෑකඩුව මාවතෙන් නිල නිවසක් ලබා දී තිබිණ( පසුව ඔහු ඉන් ඉවත් විය) මෛත්‍රිපාල සිරිසේන මහතාට ලබා දී ඇති විශ්‍රාම වැටුපේ වටිනාකම රුපියල් 97500 කි.  රුපියල් ලක්ෂයක දීමනාවක් ලබා දී තිබිණ.

ඔහුගේ පාවිච්චියට නිල රථ දෙකක් ලබා දී තිබූ අතර CAR 8775 සහ CBH 7597 එම වාහන දෙකයි.

හත්වැනි විධායක ජනාධිපති ගෝඨාභය රාජපක්ෂ මහතා වෙනුවෙන් මසක් වෙන් කර නැති අතර ඔහුට හිමිවන විශ්‍රාම වැටුප රුපියල් 97500කි. ඔහුගේ ලේකම්වරයා වෙනුවෙන් රුපියල් ලක්ෂයකදීමනාවක් පිරිනමා ඇත. ඔහුටද වාහන දෙකක් හිමිවූ අතර CBO  7521 සහ  PK 7090 එම වාහන දෙකයි.

අට වැනි විධායක ජනාධිපති රනිල් විමසිංහ මහතාද නිල නිවසක් ලබාගෙන නැති අතර ඔහුගේ ලේකම්වරයාට හිමිවූ දීමනාව රුපියල් ලක්ෂයකි. ඔහුද නිල රථ දෙකක් ලබාගෙන ඇත. CAV 8103 සහ  KX 5301  එම  වාහන දෙකේ වේ.

මේ අතර පස්වන විධායක ජනාධිපති මහින්ද රාජපක්ෂ මහතාගේ නිල නිවස අලුත් වැඩියා කිරීම සඳහා රුපියල් කෝටි පනස් එකකට වැඩි මුදලක් වැය කර ඇතැයි එම ආරංචි මාර්ග සඳහන් කළේය.

එසේම එම නිල නිවසේ විදුලි ජනක යන්ත්‍ර සඳහා ඉන්ධන ඩීසල් ලීටර් 210 ක්ද ජනාධිපති කාර්යාලය විසින් ලබා දෙනු ලැබ තිබිණ.