(බිමල් ශ්‍යාමන් ජයසිංහ )

අලුත් කඩේ අධිකරණ සංකීර්ණය තුළ දී සංවිධානාත්මක අපරාධ කල්ලි නායක ගනේමුල්ල සංජීව වෙඩි තබා ඝාතනය කිරීමේ සිද්ධියේ ප්‍රධාන සැකකාරියට ඉන්දියාවට පලායාම සඳහා බෝට්ටු  සැපයූ පුද්ගලයාගේ කිලිනොච්චිය නිවසේ සඟවා තිබූ පිස්තෝල වර්ගයේ ගිනි අවි දෙකක් සහ උණ්ඩ සොයාගත් බව කොළඹ අපරාධ කොට්ඨාසය කියයි.

කොළඹ නුවර මාර්ගයේ තිහාරිය ඕගොඩපොළ ප්‍රදේශයේ රැඳී සිටියදී අත්අඩංගුවට ගත්  අන්තෝනි පිල්ලේ ආනන්දන් නැමති සැකකරු පැය 72ක කාලයකට  රැඳයුම්  නියෝග මත සිදුකළ ප්‍රශ්න කිරීමේ දී සැකකරුගේ පෙන්වාදීම මත එම ගිනි අවි සහජීව උණ්ඩ සොයාගෙන ඇත.

මෙම සැකකරු විසින් 2019.04.19 වෙනි දින සිදු කරන ලද පාස්කු ඉරුදින  ප්‍රහාරයට සම්බන්ධ සැකකරුවන් කිහිපදෙනෙකුද මුහුදු මාර්ගයෙන් පලා යාමට අවශ්‍ය කටයුතු ද සිදුකර ඇති බවට ද තොරතුරු අනාවරණය වන බවක් ඒ සම්බන්ධයෙන්ද විමර්ශන කටයුතු සිදු කරන බවත් ජ්‍යෙෂ්ඨතම පොලිස් නිලධාරියකු පැවසීය.

මෙම සැකකරු ඉෂාරා සෙව්වන්දි නැමති සැකකාරිය මුහුදු මාර්ගයෙන් ඉන්දියාවට පලායාමට දැනට විදෙස් ගතව සිටින මොහොමත් රිස්වි නොහොත් සිලෝන් බායි යන පුද්ගලයාගේ උපදෙස් මත බෝට්ටු පහසුකම් ලබා දුන් බවට වැඩිදුරටත් අනාවරණය වී ඇත.