(යොහාන් භාසුර)

ලංකා විදුලිබල මණ්ඩලය එහි ස්ථිර සේවකයන්ට දෙන පෞද්ගලික ණය වෙනුවෙන් ආරම්භයේ සිට දරා ඇති වියදම් සම්බන්ධයෙන් වාර්තාවක් දෙන ලෙස විදුලිබල හා බලශක්ති අමාත්‍ය කාංචන විජේසේකර මහතා විදුලිබල මණ්ඩලයේ සභාපතිවරයාට ලිඛිතව දැනුම්දී තිබේ.

ලංවිමට සේවකයන් බඳවාගැනීම අත්හිටුවා ඇති මේ අවස්ථාවේ පිය පුතු පදනම මත සේවකයන් බඳවාගැනීමට සම්මුඛ පරීක්‍ෂණ පවත්වා ඇති බවත් එම පදනම මත වර්තමානයේ බඳවාගෙන ඇති සේවකයන් පිළිබඳ වාර්තාවක් ද සපයන ලෙස එම ලිපියෙන් අමාත්‍යවරයා ඉල්ලා තිබේ.

ලංවිම ප්‍රතිව්‍යුහගතකරණය කරමින් සිටින අවස්ථාවක විදුලිබල අමාත්‍යංශයේ පූර්ව අනුමැතියෙන් තොරව සේවකයන් බඳවාගැනීම නොකළ යුතු බව ද අමාත්‍යවරයා කියයි.  

ලංකා විදුලිබල මණ්ඩලයේ වියදම් අඩුකරමින් ජනතාවට සහනදායි මිලකට විදුලිය සැපයීමේ ආයතනයක් බවට පත්කිරීම සඳහා ප්‍රසාද දීමනා සහ වෙනත් දීමනා අත්හිටුවීමේ ක්‍රියාවලියේ දිගුවක් ණය පිළිබඳව සොයා ලබන බවත් ලංවිම ණය වෙනුවෙන් බැංකු සහ මූල්‍ය ආයතනයවලට ගෙවන පොලී අනුපාතවල පරස්පරයක් ඇතැයි වාර්තා වී ඇති බවත් අමාත්‍යවරයා එම ලිපියේ වැඩි දුරටත් සඳහන් කර තිබේ.