(අංජුල මහික වීරරත්න)

මිද්දෙනියේ ඉඩමකින් හමු වූ  රසායනික ද්‍රව්‍යයෙන් ලබාගත් සාම්පල 20 න් 17 ක මෙතැපිටමින් හෙවත් අයිස් (Methamphetamine) මත් ද්‍රව්‍ය අන්තර්ගතවී ඇති බවට පරීක්ෂණ වලින් තහවුරු වී ඇතැයි අන්තරායකර ඖෂධ පාලක ජාතික මණ්ඩලයේ සභාපති විශේෂඥ වෛද්‍ය ඉන්දික වන්නිනායක මහතා පවසයි.

එම මෙතැපිටමින් 2022 අංක 41 දරන විෂ වර්ග, අබිං සහ අන්තරායදායක ඖෂධ වර්ග (සංශෝධන) පනත සහ 2008 අංක 01 දරන මාදක ඖෂධ සහ මනෝ වර්තක නීති විරෝධී ලෙස ජාවාරම් කිරීමට එරෙහි සම්මුති පනත යටතේ ලැයිස්තු ගත කර ඇතැයි ද වන්නිනායක මහතා කියයි.

බස්නාහිර පළාත (උතුර) අපරාධ කොට්ඨාශය විසින් යොමු කරන ලද ඉල්ලීමට අදාලව අන්තරායකර ඖෂධ පාලක ජාතික මණ්ඩලයේ නිලධාරීන් කණ්ඩායමක් ඉකුත් 5 වැනිදා මිද්දෙනියේ අදාල ස්ථානය පරීක්ෂා කර එම ස්ථානයෙන් අහඹු ලෙස ලබාගත් සාම්පල 20 ක් රසායනාගාර පරීක්ෂාවට ලක්කර ඉහත තීරණයට එළඹ තිබේ.

අදාල විශ්ලේෂණ වාර්තාව බස්නාහිර පළාත (උතුර) අපරාධ කොට්ඨාශය වෙත යොමු කර ඇතැයි ද විශේෂඥ වෛද්‍ය ඉන්දික වන්නිනායක මහතා සඳහන් කළේය.