(අංජුල මහික වීරරත්න)

පසුගිය පාලන වලින් තිබුණු කිසි කරදරයක් වත්මන් ආණ්ඩුව යටතේ කොන්ත්‍රාත්කරුවන්ට මුහුණ දෙන්නට සිදුවන්නේ නැතැයි වරාය මහා මාර්ග හා ගුවන් සේවා අමාත්‍ය බිමල් රත්නායක මහතා මධ්‍යම අධිවේගී මාර්ග ව්‍යාපෘතියේ පළමු කොටස වන කඩවත සිට මීරිගම දක්වා ඉදිකිරීම් ඇරඹීමේ උත්සවය අමතමින් පැවසීය.

ජනාධිපති අනුර දිසානායක මහතාගේ ප්‍රධානත්වයෙන් මෙම වැඩ ඇරරඹීම සිදුකෙරෙයි. 

"2028 සිංහල දෙමළ අවුරුද්ද වන විට අප මේ මධ්‍යම අධිවේගී මාර්ගය සම්පූර්ණ කරනවා. 

රඹුක්කන සිට ගලගෙදර දක්වා ඉදිකිරීම් කටයුතු මේ වසරේදී ඇරැඹීමට අදහස් කරනවා.වරාය පිවිසුම් මාර්ගයේ වැඩ සියයට 98ක් ඉවරයි. ඒ වැඩකටයුතු ලබන වසර වන විට අවසන් කරන්නට බලාපොරොත්තු වෙනවා වෙනවා.

රුවන් පුර අධිවේගී මාර්ගයේ වැඩ නතර වී තිබුණා.එහි ඉංගිරිය දක්වා ඉදිකිරීම් කටයුතු ඉතා ඉක්මනින් ඇරඹීමට කටයුතු කරනවා.ඉංගිරියේ සිට රත්නපුර දක්වා මාර්ග හොඳින් සංවර්ධනය කරනවා.

දක්ෂිණ අධිවේගී මාර්ගය වසර දොළහකින් පමණ අලුත් වැඩියා කර නැහැ.මේ වන විට එහි ප්‍රතිසංස්කරණ කටයුතු අරඹා තිබෙනවා.දක්ෂිණ අධිවේගී මාර්ගයේ තිබෙන්නේ එක සේවා මධ්‍යස්ථානයක් පමණයි.උඩුකාව ප්‍රදේශයේ තව කුඩා සේවා ස්ථානයක් අප අරඹනවා.කටුනායකින් ටිකට් එක ගත් පසු මාතරින් ගෙවිය හැකි පරිදි අප කටයුතු ආරම්භ කරනවා. එවිට කෙළවරපිටියෙන් අමතර ගෙවීමක් කරන්නට සිදුවන්නේ නැහැ.තව මාස දෙකක් ඇතුළත ඒ කටයුතු සම්පූර්ණ කරනවා.ඉදිරියේදී ජාතික මහා මාර්ග සැලැස්මක් අප හදනවා යනුවෙන්ද බිමල් රත්නායක මහතා කීය.