2021 සැප්තැම්බර් මස 21 වන අඟහරුවාදා
සයිනොෆාම් එන්නත් වැඩිම තොගය හෙට දිවයිනට
(සුජිත් හේවාජුලිගේ )
චීන රජය ප්‍රදානය කරන සයිනොපාම් එන්නත් මාත්‍රා ලක්ෂ 16ක් සහ එන්නත් සිරින්ජර ලක්ෂ 26ක් අද (27) දිවයිනට ලැබෙන බව ඖෂධ නිෂ්පාදන, සැපයීම් හා නියාමන රාජ්‍ය අමාත්‍ය මහාචාර්ය චන්න ජයසුමන මහතා පවසයි.
මෙය චීන රජය එක් වරකදී ප්‍රදානය කරන සයිනොපාම් කොරෝනා මර්දන එන්නත් වැඩිම ප්‍රමාණය බවද හෙතෙම සඳහන් කළේය.
මේ අනුව චීන රජය මෙරටට මේ දක්වා ප්‍රදානය කර ඇති සයිනොපාම් එන්නත් මාත්‍රා ප්‍රමාණය ලක්ෂ විසි හතක් දක්වා ඉහළ යනු ඇත.
මෙම එන්නත් තොගය රාජ්‍ය අමාත්‍ය චන්න ජයසුමන මහතා ඇතුළු නිලධාරීන් කණ්ඩායමක් විසින් කටුනායක ගුවන් තොටුපොළේදී අද උදේ බාර ගනු ලැබීමට නියමිතය.
මේ අතර සයිනොපාම් එන්නත් ලබා ගත් අයගෙන් සියයට 95 කට පමණ ඉහළ ප්‍රතිශක්තියක් ලැබෙන බව ශ්‍රී ජයවර්ධනපුර විශ්වවිද්‍යාලයේ වෛද්‍ය පීඨයේ ආසාත්මිකතා ප්‍රතිශක්තිවේද සහ සෛල ජෛව විද්‍යා අධ්‍යයන අංශය කළ පරීක්ෂණයකදී සනාථ වී ඇත.
