(අංජුල මහික වීරරත්න)

සියලුම හදිසි මරණ පරීක්ෂක වරුන් ප්‍රාදේශීය ලේකම් කොට්ඨාස හා හඳුනාගත් රෝහල් සඳහා අනුක්ත කිරීමටත් ද්විභාෂා ප්‍රාදේශීය ලේකම් කොට්ඨාස සඳහා ද්වි භාෂා හදිසි මරණ පරීක්ෂක වරුන් අලුතින් පත් කිරීමටත් පවතින පුරප්පාඩු සම්පූර්ණ කිරීම සඳහා අළුතින් බඳවා ගැනීම් සිදු කිරීමටත් කැබිනට් මණ්ඩල අනුමැතිය ලබා දී ඇත.

හදිසි මරණ පරීක්ෂක වරුන් පත් කිරීම කෝරාළ පදනමින් නාගරික කොට්ඨාස පදනමින් හා රෝහල් පදනමින් සිදු කරනු ලැබ ඇති බැවින් අදාළ බල සීමාවන්හි මායිම් නිශ්චිතව හඳුනාගැනීමට නොහැකි වීම හේතුවෙන් හදිසි මරණ පරීක්ෂක වරුන්ගේ සේවාව ලබා ගැනීමෙි දී ජනතාවට අපහසුතාවයන්ට මුහුණ පෑමට සිදුව ඇතැයි රජය හඳුනාගෙන තිබේ.

එසේම දීර්ඝ කාලයක් තුළ හදිසි මරණ පරීක්ෂක පත්වීම් ලබා නොදීම මත ඇතැම් දිස්ත්‍රික්කයන්හි පුරප්පාඩු විශාල වශයෙන් පැවතීම හේතුවෙන් ද මහජනතාව අපහසුතා පැන නැගී ඇති බව රජය පවසයි.

එම ගැටළු නිරවුල් කර මහජනතාවට වඩාත් කාර්යක්ෂම හා විධිමත් සේවාවක් සැලසීමේ අරමුණින් හදිසි මරණ පරීක්ෂකවරුන් පත් කිරීමේ සුදුසුකම් ඔවුන්ගේ වගකීම හා කාර්යභාරයන් ඇතුළු විධිවිධාන පැහැදිලිව දක්වමින් ස්ථාවර කාර්ය සංග්‍රහයක් අධිකරණ බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණය අමාත්‍යාංශය විසින් සකස් කරනු ලැබ ඇත.