(විමුක්ති එස් රුද්‍රිගු)

මනුෂ්‍යත්වයට එරෙහි අපරාධ චෝදනා 5ක් යටතේ ජාත්‍යන්තර අපරාධ විනිශ්චය සභාවේ බංග්ලාදේශ හිටපු අග්‍රාමාත්‍ය ෂෙයික් හසීනාට එරෙහිව ගොනුකර තිබෙන නඩුවේ තීන්දුව අනිද්දා (17) ප්‍රකාශයට පත් කිරීමට නියමිත අතර රජයේ නීතිඥවරුන් හසීනාට මරණ දඬුවම නියම කරන ලෙස විනිශ්චය සභාවෙන් ඉල්ලීමක් කර ඇත.

රජයේ රැකියා කෝටාව සම්බන්ධයෙන් පසුගිය වසරේදී ඇතිවූ විරෝධතා වලදී මනුෂ්‍යත්වයට එරෙහි අපරාධ සිදුකළ බවට ෂෙයික් හසීනාට එරෙහිව චෝදනා එල්ල වූ අතර රජයේ නීතිඥවරුන් ප්‍රකාශ කර සිටියේ කුමක් හෝ කර බලයේ රැඳී සිටීම ඇයගේ එකම ඉලක්කය වූ බවයි. එම විරෝධතා දැඩිවීමත් සමග අග්‍රාමාත්‍ය ධුරයෙන් ඉල්ලා අස්වී ඇය ඉන්දියාවට පළා ගිය අතර ඉන්දියාවෙන් ඇයට දේශපාලන රැකවරණ හිමිවිය.

එම විරෝධතාවලදී 1400ක් පමණ මියගොස් ඇති බව එක්සත් ජාතීන්ගේ සංවිධානය ප්‍රකාශ කළ අතර බංග්ලාදේශ බලධාරීන් ප්‍රකාශ කර ඇත්තේ එම විරෝධතාවලදී 800 ක් පමණ මියගොස් තවත් 14,000 ක් පමණ තුවාල ලබා ඇති බවයි.

බංග්ලාදේශ ජාත්‍යන්තර අපරාධ විනිශ්චය සභාවේ ප්‍රධාන රජයේ නීතිඥ මොහොමඩ් තාජුල් ඉස්ලාම් ප්‍රකාශ කර සිටියේ ෂෙයික් හසීනාට විරෝධතාවලදී මියගිය 1,400 දෙනා වෙනුවෙන් මරණ දඬුවම 1,400 වතාවක් හිමිවිය යුතු බවය. එය සිදුකළ නොහැකි ක්‍රියාවක් නිසාවෙන් හසීනාට මරණ දඬුවම නියම කළ යුතු බව ඉස්ලාම් පැවැසුවේය.